Accessibility links

дүшәмбе, 5 декабрь 2016, Казан вакыты 05:31

Ğiraqnıñ Kirkuk şähärendä 5 meñläp keşe demonstratsiägä çıqtı


Ğiraqnıñ tönyağındağı Kirkuk şähärendä uzğan ayda qulğa alınğan ıru başlığın azat itü taläbe belän 5 meñläp keşe demonstratsiägä çıqtı. AQŞ xärbiläre anı neftütkärgeçlärgä zıyan kiterergä öndäwdä şiklänep qulğa alğan ide. Demonstratsiäçelär Kirkuknıñ milläte belän körd bulğan gubernatorın wazıyfasınnan alunı häm yaña saylawlar ütkärüne dä taläp ite. Ğiraqnıñ könyağındağı Basra şähärendä isä Şiğilarnıñ äd-Däwa partiäse idaräsenä ike märtäbä ut açıldı. Partiä wäkile Cäbbar Latif saqçılar höcüm itep qaçıp kitüçelärneñ bersen tottı, ikençese qaçıp ölgerde dide. Bu höcümnärdä yaralanuçılar bulmağan. Başqala Bağdadta elek Säddam Xösäinneñ prezident saraylarında eşlägän 200-läp keşe tülänmi qalğan xezmät xaqların taläp itep uramğa çıqtı. Alar xäzer Ğiraqtağı AQŞ administratsiäse urnaşqan elekke prezident sarayı qarşına cıyılıp Amerikağa qarşı şiğärlär qıçqırdı häm AQŞ soldatlarına taşlar attı. Ğiraqnıñ pol'şa xärbi citäkçelegenä qarağan öleşendä, Wäsit wiläyätendä xezmät itüçe Ukrain soldatı tikşerü qapqasında tuqtamağan maşinağa ut açıp ğiraqlı maşina yörtüçene üterde. Bügen Ğiraqnıñ Britan qaramağındağı könyaq öleşenä östämä Britan xärbiläre kilä başladı. Britaniä tağın 120 xärbi cibärü turında qarar qabul itkän ide. Bügen kiç AQŞ Prezidentı George Bush üz çığışında Berläşkän Millätlär Oyışmasınnan Ğiraqta totrıqlılıq urnaştıruda kübräk yardäm itüne sorar dip kötelä.

XS
SM
MD
LG