Tatarstanda da bäyräm ruxı köçle buldı. 7nçe sintäber - Neft' häm gaz xezmätkärläre köne, çınnan da, Tatarstannıñ milli bäyrämenä bärabär. Bu uñaydan premyer-ministr Röstäm Miñnexanov tarmaq eşçelärenä häm veterannarına täbrik süzläre belän möräcäğät itte. Tatarstan danınıñ yartısınnan da kübese şuşı cir mayı belän bäyle. Şunlıqtan, neft'çelär bik şäpläp bäyräm itte bu yalda. Tatarstan neften taba başlağanğa 60, Älmät şähäre tözelügä 50 yıl tulu uñayınnan oyıştırılğan çaralar Mäskäwdäge utlar häm fanfaralar taşqınınnan qalışmadı. Matbuğatta, radio-televidenie Älmät süze cännät süze belän rifmalandı. Çınnan da, Älmätne tözekländergännär, bizägännär soñğı waqıtta. Bäyrämgä äzerlekkä Tatarstan xökümäte 100 million sum aqça birgän. Ä respublika neft'çeläre Tatarstanğa, SSSRğa, Rusiägä küpme baylıq birgänen sanap betep bulmıy. Ber genä san. Ğomumän Tatarstan neft'çeläre 2 milliard yarım tonna cir mayın çığarğannar. Älmättä, Bögelmädä bulğan çaralar respublika mäğlümat çaralarında kiñ yaqtırtıldı. Tatarstan neft'çelärenä Rusiä prezidentı Vladimir Putin täbrik xatı cibärde.
Neft' bäyrämenä Mäskäwdän kilgän qunaqlar arasında ataqlı sänğät'kärlär, sportçılar da bar ide. Bögelmädä tuıp üskän mäşhür cırçı Nadejda Kadışeva muqşı xalqınıñ ğına tügel, ä rus sänğäteneñ ürnäk yoldızı bulıp kitte. Neft'çelär bäyrämendä Mintimer Şäymiev Nadejda Kadışevağa Tatarstannıñ Xalıq artistı digän diplom tapşırdı. Ä yäş kenä kileş Tatarstannıñ Atqazanğan artistı isemen alğan Alsu Safina şulay uq Bögelmädä tuğan. Anıñ ätise eşquar häm säyäsätçe Ralif Safin neft'çelär bäyrämenä üzeneñ dusların alıp kilgän. Ul da bulsa, tarixta berençe tapqır Rusiägä ataqlı Devis kuboğın yawlağan tennisçılarnıñ citäkçese Şamil Tarpişçev häm başqa ataqlı sportçılar, trenerlar. Şamil Tarpişçev ber arbağa sıyarlıq şuşı zinnätle sawıtnı Älmätkä, Bögelmägä alıp kilep kürsätte. Rusiäneñ sport ministrı Vyaçeslav Fetisov ta kilgän ide.Yäkşämbe kiçendä Tatarstannıñ Bawlı rayonında, Oktäberski qalası qarşındağı Iq yarında iskitkeç zur tamaşa buldı. Cırçı Alsu Safina çığışı aldınnan Devis kubogı kürsätelde. Älege konsertta Ralif Safinnıñ da buluı anıñ üzeneñ tuğan Başqortostan respublikası prezidentı bulırğa cıyınuına işarä ide.
Yäkşämbe kiçendä Qazanda salqın cil-dawıl kütärelsä, respublikanıñ könçığışında, Bawlı belän Oktäberski arasında, açıq hawada Alsu konsertı ütte. Anda 100 meñgä yaqın keşe qatnaştı.Şik yuq, Iq yılğası yarında ütkän şuşı konsertnıñ qaytawazı şaqtıy yıraqqa kitäçäk. Başqortostan respublikası ni öçender cır, biyu törkemnären çittän kertmäw, räsmi xakimiätkä oşamağan şäxeslärne yaqın cibärmäw yulı belän üzeneñ möstäqillegen saqlıy. Ber xoquqi möxittäge Rusiä töbäkläre, üzara kileşülär tözegän respublikalar arasında qoymalar, çiklär, mädäniättä çikläwlär irtäme-soñmı cimereläçägenä işarä bulıp kürenä Alsu konsertı.
Rimzil Wäli
