Şunı äytergä kiräk, TVT kabel' televideniese çeltäre — xosusıy şirkät, häm aña räsmi dairälärdän bernindi dä basım yuk. TVT menedjerlarınıñ berse bezgä äytüençä, alar Başqortostan kanalın berkemneñ dä boyırığı buyınça tügel, ä üzläre saylap alğan, çönki anıñ eçtälegen Qazan televizor qarawçıları öçen qızıq dip tapqannar.
Bügenge köndä Qazan şähäreneñ kabel' televideniese 20 meñnän artıq ğailägä kergän, dimäk, anı yaqınça 60 meñnän artıq keşe qarıy ala. Çeltär üskän sayın, Qazanda Başqortostan televizion kanalın qarawçılarnıñ sanı da artaçaq.Kiçä kiç BST kanalınıñ turı efirda barğan “Xäyerle kis” tapşıruında bik qızıqlı ängämä kürsätelde. Anda Ufağa gastrol'lär belän kilgän Qazannıñ Kärim Tinçurin isemendäge tatar drama häm komediä teatrı wäkilläre BST studiäsenä şaltıratuçılar belän teatr tormışı, akter bulır öçen keşegä kiräk bulğan sıyfatlar turında söyläştelär. Şaltıratuçılar arasında tatar, başqort häm xätta urıs telendä soraw birüçelär dä buldı. Studiägä şaltıratqan ber Tatar ağayı, Tinçurin teatrı nigä Ufada häm Stärletamaqta ğına spektakl'llär quyarğa buldı dip soradı. Anıñ süzlärençä tatar teatrın respublikanıñ başqa şähärlärendä dä bik kötälär ikän.
Tinçurin teatrınıñ direktorı Fänil Mosağıytov bu sorawğa bolay cawap birde.Аudio.
Bezneñ isäp bar ide Salawatqa, Kümertawğa, başqa bik küp cirlärgä dä barırğa. Läkin Salawatqa bezne nişläpter kertmädelär, Mädäniät yortında urınıbız yuq didelärme şunda... häm ber sigezläp cirdä şulay buldı. Bäläbäydä dä şul uq xäl qabatlandı.Şunı äytergä kiräk, tapşırunı alıp baruçı şuşı cirdä äñgämäne tiz genä özep, anı “döres yulğa” qaytarırğa tırıştı. Menä tıñlap qarağız äle.
Аudio....Här teatr eşmäkärgen bahalawsı iñ ğädel sara ul festival'dar, hezdeñ dä maqtanırlıq, ğorurlanırlıq uñışlarığız bardır...
“Xäyerle kis” tapşıruında kütärelgän mäs’älä çınnan da bik citdi bulıp çıqtı. Uzğan yılnıñ sintäber ayında Tatarstan däwlät cır häm biü ansamblen, ä oktäbr' ayında şulay uq Tatar cırçıları — İdris Qarimullin häm Fädis Ğanievnı Başqortostanğa kertmiçä qaytarıp cibärdelär. Ä inde berniçä kön elek cırçı Alsu konsertın Ufada da, Oktäberski şähärendä dä ütkärä almıyça, anı Başqortostan çige yanında, Tatarstannıñ Bawlı rayonı Uba awılında ütkärde.Äytep kitkän misallardan Başqortostan räsmi dairäläre Tatar artistlarınnan, cırçılardan qurqa kebek kürenä. Mondıy şartlarda Başqortostan televidenie şirkätläre Tatarstandağı kollegalarına qarap tatar milli iärçen televideniesen yaqın waqıtta Ufada retranslyatsiäläwne cayğa salırlar digän ömet zur tügel. İnşalla, bu wäzğiät berär waqıt üzgärer. Ä buğenge köndä, Qazan televizor qarawçıları räxätlänep zamança başqort estradasın tıñlıy da, qarıy da ala. Bu şatlıqnı sezneñ belän urtaqlaşır öçen BST telekanalınnan bez yazdırıp alğan Sägidulla Bayeget isemle başqaruçınıñ därtle cırın täqdim itäbez. Bu “yerdın hüzdäre” Başqortostan häm Tatarstan respublikaları öçen dä turı kilä.
Qazannan İskänder Nurmi.
