Şulay itep 11nçe sintäberdä Tatarstan Däwlät Şurasınıñ unsigezençe plenar utırışı eşen däwam itte. Sessiäneñ töp maqsatı tiz arada parlament saylawlarına qağılışlı qanunnarğa tieşle üzgäreşlär kertü. Şuña kürä deputatlar eşne tiz tottılar. Utırış başlanıp 20 minut ütkändä Tatarstan Konstitutsiäseneñ 69, 70 häm 88 matdälärenä üzgäreşlär kertü turındağı qanun proyektı ikençe uqılışta qabul itep quyılğan ide inde. Tıñlawçılarıbıznıñ kübese bu üzgäreşlärneñ asılın “Azatlıq” radiosınnan işetep belä inde. Parlamentqa 100 deputat saylanaçaq, anıñ wäkälätläre möddätennän alda tuqtatılsa, saylawlar 120 könnän dä soñğa qalmıyça ütkärelergä tieş. İkençe mäs'älä “Tatarstan Däwlät Şurası deputatların saylawnı Rusiä Federatsiäse Prezidentın saylawlar belän berläşterü turında” qanun proyektı belän dä ozaq mataşmadılar. Gärçä bu qanun prоyektı berençe uqılışta qabul itelsä dä. Qanun çığaru, qanunlılıq komissiäse räise Midxät Kormanov älege qanun proyektınıñ Rusiä häm Tatarstan qanunnarına qarşı kilmäwenä sigez dälil kiterde. Tuğızınçı dälilne ul şayaru dip “yaz köne cılı bula, saylawlar ütkärüe küñelleräk, yaña saylanuçı nämzätlärgä yoldıznamä bağuı da uñay”-dide. Qanun proyektına qarşı çığuçılar ike törle qaraşta. Deputat Sergey Oskolok “saylawçılarğa wäkälätlärebezne aldan tuqtatırğa riza buluıbıznı niçek añlatırbız häm saylawçılarıbızğa birgän wäğdälärebezne kem ütär”-digän fikerne yañğırattı. Deputat Aleksandr Ştanin ğädättägeçä tiränräk qazıdı. Ni disäñ dä Tatarstan qanunnarın reviziäläwdä ike yıllıq täcribäse bar bit. Ul bu qanunnıñ federal' qanunnar belän qarşılığı bulmasa da, läkin federal' qanun saylawlarnı berläşterergä röxsät itsä dä, mäcbür itmi dide. Şulay itep Aleksandr Ştanin fikerençä bu qanun proyektı ğämäldä däwlät şurasınıñ wäkälätlären aldan beterü turında häm bu däwlät citäkçeläre mänfäğätlärendä. Çönki Rusiä Yuğarı mäxkämäseneñ 13nçe yüldä 49 deputatnıñ wäkälätlären tuqtatuçı qararın ütärgä birelgän möddät çığa. Ğädättägeçä Aleksandr Ştaninnıñ töp opponentı bulıp Mintimer Şäymiev çıqtı. Ul deputatlarğa bu mäs'älädä däwlät citäkçeläreneñ mänfäğätläre qay tirädä buluın añlattı. Şulay itep parlament saylawların Rusiä prezidentı saylawları belän ütkärüdä bernindi dä faciğä yuq. Parlament saylawları bolay da 2004nçe yılğa bilgelängän ide. Ä inde mänfäğätlärgä kilgändä... saylawlarnı berläşterü salım tüläwçelär mänfäğätlärenä dä turı kilä - yözär millionlağan byudjet aqçaları yanğa qala. Şuña kürä parlament saylawlarına qağılışlı qanun proeyktları sintäber ayında qabul itep beterelergä tieş. Şuña kürä Tatarstan Däwlät Şurası sintäber ayında ber-ber artlı öç utırış ütkärä. Çönki waqıt qısa. Çönki federal' üzäk saylawlarnı berläşterü tieşle tärtiptä başqarılmadı dip barlıq mänfäğätläreñne, maqsatlarıñnı yuqqa çığarırğa mömkin.
Yunıs Ätnäle
