Accessibility links

Кайнар хәбәр

Äl-Cäzirä telekompaniäse Osama ben Ladennıñ yaña tasmasın kürsätte


Çärşämbe kiçendä, 11 sintäber könenä turı kiterep, Qatarnıñ Äl-Cäzirä telekompaniäse Osama ben Laden häm anıñ yärdämçese Ayman Zawahiri töşerelgän yaña tasma kürsätte. Bu tasmada Äl-Qaidä citäkçeläre Amerikağa yaña terror xöcümnäre belän yanadı

Äl-Cäzirä telekompaniäse kürsätkän tasmada Osama ben Laden häm anıñ yärdämçese Ayman Zawahiri Kalaşnikov avtomatlların elep nindider tawlı töbäktä yöri. Tasmanıñ qayda häm qayçan töşerelgäne älegä tögäl mäglüm tügel. Äl-Cäzirä citäkçeläre şuşı yılnıñ april-may aylarında, Paqstan yä Äfğanstanda bulırğa tieş dip sanıy. Amerikan belgeçläre moña ışanıp betmi, xäzer tikşerü eşläre alıp bara.

Niçek kenä bulmasın, tasmadan şul kürenä, Äl-Qaidä citäkçeläre äle da isän-saw, alay ğına tügel, Quşma Ştatarğa qarşı izge suğışnı däwam itergä çaqıra, yaña terror xöcümnäre belän yanıy.

Osama ben Laden, ike yıl elek Amerikağa qarşı intihar xöcümnär başqarğan yegetlär xaqına doğa qıldı. Berniçäsen xättä isemnäre belän atadı. Şunnan soñ, Amerika belän solıx mömkin tügel, dip cihadqa öndäde. Qurquçılarğa çunı äytäm, tawğa menergä qurqasız ikän, oyağızdan çıqmıy ğına çoqırda utırığız, dide ul.

Ayman Zawahiri, Amerika belän çın suğış äle alda dip, yaña terror ğämälläre belän yanadı. Ğiraqtağı amerikan xärbiläre analarına möräcägät itep, balalarığıznı qaytarığız, yuq isä alar tabutta qaytaçaq, dip kisätte. Fälestin xalqına möräcägät itep, Ayman Amerika täqdim itkän "yul xaritası"na aldanmasqa çaqırdı. Bu yul tämüğqa iltä, dide ul häm Fälestinlelärne cihad yulı belän barırğa öndäde.

Amerikan belgeçläre xäzer bu tasmanıñ çınlığın tikeşerä. Osamanıñ televideniedä küptän kürengäne yuq ide. Amerikan xärbiläre 2001neñ dikäberendä ul Tora-Bora xöcümnäre waqıtında nıq yaralanğan dip beldergän ide. Ämmä kiçäge tasmada, Osama çağıştırmaça sälämät kürende. Qayber küzläw belgeçläre, Äl-Qaidä citäkçeläre çığışınan soñ ğädättä terror ğämälläre bula, dip itibarnı köçäytergä çaqırdı. Ä menä saqlanu ministrı Donald Rumsfeld, bu tasmanı Äl-Qaidä citäkçeläreneñ PR tamaşası dip atadı, yänäse, alar tarafdarlarına xälläre äybät ikänen kürsätergä tırışa.

Çärşämbedä FBİ mäktäbendä yasağan çığışı waqıtında George Bush Osamanıñ isemen telgä almıy ğına, Äl-Qaidä citäkçeläreneñ 3-tän ikesen yuq itelde dide. Äl-Cäzirä tasması turındağı sorawğa ul, min anı kürmädem, digän cawap qaytardı.

Ämmä, prezidentlıqa däğwa itkän qayber demokratlar, soñğı waqıtta Osama isemen yış qına telgä ala başladı. Äytik, sişämbedä Baltimiorda ütkän debatlar waqıtında, Al Sharpton, Bush Osamanı totırğa wäğdä itkän ide. Xäzer Osamanıñ video tasmaları kino yoldızınıqınnan da kübräk, ä üze qaya soñ ul, digän soraw birde.

Ali Gilmi, Praga
XS
SM
MD
LG