Accessibility links

дүшәмбе, 5 декабрь 2016, Казан вакыты 19:47

Qadırovnıñ töp köndäşläre çitlätelde – Çeçnya prezidentı kem bulaçağı xäl itelde


Atnakiç könne tağın ike töp namzätneñ bu Çeçnya prezidentı saylawlarında qatnaşmayaçağı mäglüm buldı. Şulay itep, Kreml namzäte Äxmät Qadırov belän köräşerlek keşe qalmadı, saylawlarnıñ yazmışı xäl itelde diärgä bula...

Çeçnyada üktäberneñ 5-ndä ütäçäk prezident saylawlarına barlığı 11 namzät terkälgän ide, xörmätle tıñlawçılar. Tawış birügä 3 atna qalıp barğanda, Kreml namzäte Äxmät Qadırov belän köräşä alırday töp nazmätlär, matur çäçäkkä qoma çawlağan çüp ülännäre şikelle, "utalıp" bette. Atnakiç könne Duma deputatı Aslanbek Aslaxanov saylawlarda qatnaşmayaçağın belderde. Saylaw komissiäse anıñ terkälü qäğäzlärendä xatalar tapqan. Yänäse, ul watandaşlığın, adresın, salım qäğäzlären kürsätmägän bulğan. Mäxqämä qararı atnakiçkä kötelä ide. Ämmä çärşämbe kiçen aña Vladimir Putin şaltıratqan, häm prezident yärdämçese urının täqdim itkän. Min bu täqdimnän baş tarta almadım, dide Aslaxanov, Rusiä televideniesenä. Çeçnya saylawlarına terkälgän namzätlär arasında Äxmät Qadırov belän köräşä alırday 3 keşe bar ide: Duma deputatı Aslanbek Aslaxanov häm ike eşquar, Xösäin Cäbrailov belän Mäliq Saydullaev. Alar xättä xezmättäşlek itergä, öçeseneñ berse ikençe turğa ütkän oçraqta köçlären berläşterergä kileşkän ide. Uzğan atnada Cäbrailov saylawlarda qatnaşudan baş tarttı. Rusiä matbuğatı yazuına qarağanda, anıñ belän Rusiä prezidentı administartsiäse wäkilläre söyläşkän. Äytkänemçä, Aslaxanov monı kiçä eşläde. Mäliq Saydullaevqa kilgändä, şul uq atnakiç könne Çeçnyanıñ Yuğarı mäxkämäse, cıyılğan imzaları döres tügel dip, anıñ terkälüwen köçtän çığardı. Mäliq Rusiä mäxkämäsenä şiqäyät itmäkçe, läkin bu mäxkämäneñ nindi qarar çığarası şik uyatmıy.

Şulay itep, Çeçnya prezidentın saylawğa 3 atna qala, töp namzätlär çitlätelde, qalğan 7 namzätneñ berse dä, Qadırovqa qarşılıq kürsäterlek tügel, kiresençä, anıñ tarafdarları bulıp tora. Yağni, bu tawış birüneñ näticäse aldan bilgele, diärgä bula. Tik menä andıy näticäne Çeçen xalqı qabul iterme, xoquq yaqlawçılar, Könbatış monı tanırmı? - bu sorawlar älegä açıq bulıp qala. Bilgele bulğança, Könbatış Aslan Masxadovnı soñğı waqıtqa qädär Çeçnyanıñ qanuni räweştä saylanğan prezidentı dip sanıy ide. Comğa könne İçkeriä parlamentı wäkilläre Mäskäwdä matbuğat oçraşuwı ütkärep, Masxadovnı prezident urınnan alu turında qarar qabul itülären belderde. Parlament räise wazifasın başqaruçı İsa Temitrov süzlärençä, Masxadov, xakimiät üzläşterüdä, Şäriğät qanunı kertedä, qısqası, Çeçen konstitutsiäsen bozuda ğäyeplänä. İsa süzlärençä, 43 deputatnıñ berse genä qarşı bulğan. Şuşı qarar sintäberneñ 5-ndä ük qabul itelgän bulğan, nigäder bu turıda, ber atna ütkäç xäbär itelde. Şulay itep, Kremlneñ teläge tormışqa aşa diärgä bula. Äxmät Qadırov Çeçnya prezidentı bulaçaq. Tik menä bu näticä Çeçnyada tınıçlıq urnaşuda yärdäm iter mikän? Qadırov inde bolay da soñğı 3 yıl buyına respublika belän citäkçelek itte. Anı prezident dip atawdan ğına närsä üzgärer ikän?

Ali Gilmi, Praga
XS
SM
MD
LG