Accessibility links

сишәмбе, 6 декабрь 2016, Казан вакыты 13:21

Qazannıñ meñyıllığına äzerlek belän Rusiä finans ministrı Aleksey Kudrin tanıştı...


12nçe sintäber könne Qazan Mäskäwgä yäki Peterburgqa oşap tordı. Tözeklelek yäki baylıq buyınça tügel. Qızğanıçqa qarşı, xäzergä äle Qazan üzägendä buşağan, cimerek yortlar adım sayın oçrıy, çoqırlı-çaqırlı yullar, watılğan trotuar da elekkeçä qala birä. Tağın ike yıldan, Qazannıñ meñyellığın bilgelägändä dä, şähärdä mondıy yullar qalmas, dip ömetlänäse kilä. Ä xäzergä şähär elekkeçä, ämma comğa könne biregä Rusiä xaqimiäte dilbegäsen totuçılar kilde. Alar başqala buylap yörgändä kilep tuğan avtomobil’ bökeläre dä Mäskäwnekelärdän ällä ni qalışmadı.

Köndezge säğät berençe yartıda Qazan kremlendä şähärneñ meñyıllığın ütkärügä äzerlek komissiäse üzeneñ çirattağı utırışın açıp cibärde. Xäterlisezder, Vladimir Putin premyer-ministr çağında uq, Peterburgnıñ 300 yıllığın häm Qazannıñ meñyıllığın qarşılaw komissiäläreneñ räise itep raslanğan ide. Prezident bulıp saylanğaç ta, Putin älege komissiälärneñ citäkçelegennän kitmäde. Berniçä tapqır ul Qazanğa kilep, tözeleş eşläreneñ niçek baruı belän tanıştı, belgeçlärneñ xisapların tıñladı. Bu yulı isä Qazanda Rusiä ministrları häm bank, törle däwlät oyışmaları citäkçelärennän torğan komissiä äğzäläre üzläre tügel, ä alarnıñ urınbasarları buldı. Ämma, bu urınbasarlar ağımdağı oyıştıru, finans eşlären kön sayın üz qullarında totalar. Şunlıqtan, bu utırışnı Qazan zur ömetlär belän kötte. Çönki wäğdä itelgän zur aqçalar haman kilep citä almıy, planğa kergän möhim çaralar ütälmägän. Bälki xälitkeç mäs’älälärne eş yörtüçe keşelär belän tikşergäç, metro tözeleşe, borınğı tarixi üzäkne tözekländerü kebek möhim ğämällärgä aqça ciñelräk tabılır.

Komissiä äğzäläre Mäskäwdän maxsus oçqıç belän tönlä kilep töştelär. Alarnı prezident Mintimer Şäymiev häm başqa citäkçelär qarşılap, Piramida tamaşa üzägenä alıp bardılar. Şuşı zatlı binanıñ iñ yuğarı noqtasında urnaşqan restoranda berençe oçraşu, Tatarstan sänğäte ürnäkläre belän tanışu, xäzerge xäl turında fiker alışu buldı. Ul canlı şartlarda bardı häm şaqtıy soñ tämamlandı. Şuña da qaramastan, irtän Qazandağı obyektlar belän tanışu, konkret mäs’älälärrne öyränü däwam itte.

Qazannıñ meñyıllığına äzerlek komissiäseneñ dürtençe utırışın Tatarstan prezidentı Mintimer Şäymiev alıp bardı. Ul berençe bulıp süzne Däwlät komissiäse räise urınbasarı, Rusiä xökümäte vitse-premyerı, finans ministrı Aleksey Kudrinğa birde. İnde xäbär itkänebezçä, yulğa çığarğa ike kön qalğaç, Kudrin prezident Vladimir Putin belän oçraşıp, annan kürsätmälär alğan ide.

Utırışta meñyıllıqqa äzerlek programmasınıñ ütäleşe turında dokladlar belän Rusiäneñ iqtisadi üseş ministrı urınbasarı Möxämmät Tsikanov, şähär xakimiäte başlığı Kamil İsxakov çıqtılar. Meñyılıqqa äzerlekne häm bäyrämne ütkärüne mäğlümat çaralarında yaqtırtu turında Rusiä matbuğat ministrı urınbasarı Andrey Romançenko çığış yasadı. Şulıy uq, Rusiä xökümäteneñ yuğarı citäkçeläre Nikolay Maslov, Nikolay Korenev, Tatarstan premyer-ministrı Röstäm Miñnexanov häm başqalar äzerlek turında täfsille mäğlümat birdelär. Süz kübräk eşlänäse eşlär, finans resurslarnı tabu yulları, oyıştıru ğämälläre turında bardı. Bu xaqta tögälräk mäğlümat soñraq iğlan iteläçäk. Älegä şunısı ğına bilgele, dönya bankınnan 200 million dollar kredit alu mömkinlege, metro tözeleşe, şähär eçendä Qazansu aşa 4nçe küper salu plannarı, tarixi üzäkne, mädäni yädkärlärne ayaqqa bastıru kebek mäs’älälärgä açıqlıq kertü ciñel bulmasa da, comğa könne Qazanda ütkän bu utırış Tatarstan başqalasın üzgärtergä yärdäm itär.

XS
SM
MD
LG