Bügen bez sezgä menä şunı surätlärgä telibez. Bu tapşıruda säyäsät, prezidentlıq bäygese turında süz quyırtıp tormabız. Militsiäneñ räsmi mäğlümatına qarağanda, Iq küpere aşa bu kiçtä 60 meñ keşe Oktäberskiy şähäre qarşındağı tuğaylıqqa ni öçen çıqqanlığın añlatu öçen, Ufadan, Tuymazıdan başqa şähärlärdän kilgän qayber millättäşlärebezneñ fikerläre şundıyraq buldı: “İşetüebezçä,bügen Alsunıñ konsertı bula, Alsunıñ konsertına Rusiäneñ Federatsiä Sovetı äğzäse Ralif Safin da kilä ikän,ul Başqortstan Prezidentı saylawlarında qatnaşuın beldersä, bez bik şatlanır idek, çönki Başqortstanda tatar mäs’äläre haman da çişelmi qala birä, ä bezgä ğädel Prezident kiräk”.
Sez äle işetkän süzlär sänğät'kä, mädäniätkä, şäxeskä tartılunıñ säyäsi säbäpläre dä buluın kürsätä. Ralif Safin bu kiçädä säyäsät, Başqortstan xakimiäte turında süz quyırtmadı. Äle räsmi adımnar yasarğa irtäräk, saylaw iğlan itelmägän. Ul Mortaza Räximovnı xurlaw belän şöğellänmäde, kiresençä, anıñ respublika öçen küp eş başqaruın äytte. Prezident bulğan oçraqta da, elekke eşlärne qazıp, reviziä yasarğa cıyınmawın belderde ul.Şunıñ belän saylaw häm säyäsät mizgelläre bette diärgä bula. Barı tik konsert häm anı oyıştıru, şuşı kiçäneñ qunaqları küz aldında buldı.
Alsu Safinanıñ, ataqlı sportçılarnıñ başqa töbäklärdä çığış yasağan kebek, Ufada yäki Oktäberskida xalıq belän oçraşuı kiñ cämäğätçelek öçen tawışsız, tınsız ütep kitkän ide. Ä bit alar 17läp ölkä häm şähärdä çığış yasağannar. Barı tik Alsunıñ ätise Ralif Safin 5-6 yıl buyı neftçe bulıp eşlägän Oktäberskiğa, anıñ tuğan respublikasına çirat citkäç kenä, nindider qarşılıqlar kilep çıqqan. Konsert aldınnan bilgele artist Mixail Gruşevskiy bu turıda bolay dide.“Qayber qatlawlı säbäplär aşa,bu konsertnı Başqortstanda uzdırıp bulmadı, ä Oktäberskiy şähäreneñ stadionın sörderep, (çınmı,şayarıpmı), bäräñge utırtıp quyğannar”, yarıy äle keşelek dönyasında duslıq, qunaqçıllıq digän närsä bar”- dide ul.
Ex, säyäsät, säyäsät! Keşelärne qızdıra ğına tügel, ayıra torğan äkämät bulıp çıqtı ul, säyäsät. Şulay da, keşelärneñ sänğättä, sportta yarışuı berençel häm iñ ğädel yarıştır.Konsert aldınnan säxnägä kütärelgän şäxeslär, çın yoldızlar xäzerge zaman geroyları, tatar xalqınıñ ğorurlığı, Rusiägä tennis sportı danın kitergän Şamil Tarpişçev, anıñ şäkertläre Mixail Yujnıy, Yevgeniy Kafel'nikov, Salawat Yulaev xokkey komandasınıñ ataqlı sportçıları bularaq dan alğan İrek Gimaev, Aleksandr Semaq, Roman Xäydärov häm başqa yegetlär Başqortostannıñ da, Tatarstannıñ da, Rusiäneñ dä ğorurlığı. Şamil Tarpişçev üzeneñ çığışın bolay dip tämamladı:
“Bez Ralif Safin belän Sportivnaya Rossiä Prezidiumı ägzäläre bularaq, härber ğailäneñ sport belän dus buluın telibez. Rusiäneñ Devis quboğın yawlawda Ralif Safinnıñ kertkän öleşe bik zur.”- dide.Ralif Safin qısqa ğına çığış yasağannan soñ, çirat Alsuğa citte.
Bügenge reportajda bu konsertnıñ awazların, programmanı, cırlarnıñ eçtälegen häm sıyfatın citkerep bulmas axrı. Alsu ingliz, rus, tatar tellärendä çığış yasadı. Yäşlär anı görläp qul çabıp qarşıladı. “Aq çişmä” häm “Ätkäyem” digän cırlar da törle millät yegetläre, qızları tarafınnan qaynar qabul itelde. Alsu fenomenı häm zamança estradanıñ milli üseşkä, yäşlärne oyıştıruda ähämiäte turında ayırım söyläşergä kiräkter.Axırda - şuşı konsert turında yegetlärneñ häm qızlarnıñ fikerlären tıñlağannan soñ şundıy tä’sır qala: konsertnı qarağan tamaşaçı bik qänäğät qalğan.
Änä bit, äybät dip äytä bu yeget. Çınnan da, keşelärneñ sänğätkä omtıluı, yäşlärneñ oçraşuı nişläp äybät bulmasın? Tuğan telebezne, milli moñnarıbıznı yaxşı belmägän yäşlär dä ber urınğa cıyılıp, zamança köylär tıñlap, göjläp torğan ikän, bu çınnan da qızıqlı häm möhim waqiğa. Axırı da äybät bulsın. Bernindi yılğa, urman-tawlar, xätta säyäsi uyınnar da xalqıbıznı, şulay uq qärdäş xalıqlarnı ayırmasın.Şunıñ belän Bawlı rayonı Uba awılı tuğayınnan äzerlängän reportaj tämam.
Anı Azatlıq radiosı öçen Mälikä Basıyr äzerläde.
