Accessibility links

якшәмбе, 11 декабрь 2016, Казан вакыты 07:21

Zamança texnologiälär awıl cirenä dä ütep keräçäk...


Sişämbe 16nçı sintäberdä, Qazanda mäğlümat häm kommunikatsiä texnologiälärenä bağışlanğan konferensiä üz eşen başlap cibärde. Tatarstan elemtäçeläreneñ maqsatı – yıraq aralarnı totaştıruçı kompyuter çeltären tözü, xalıqnı xakimiätlärgä yaqınaytu, awıllarda da internet päräweze belän elemtä buldırudan ğibärät.

Mäğlümatlaştıru yünäleşendä Tatarstan ğädättägeçä, böten Rusiädän alda bara. Respublikada rayon xakimiätläre belän yıraqtan torıp idärä itä torğan kompyuter çeltäre buldırıldı. Tatarstan Prezidentı da küptän tügel, multimedia elemtä aşa rayon başlıqları belän söyläşep kürsätte. Şulay uq, däwlät oyışmaları arasında elektron dokumentlar belän almaşu öçen çeltär tözü östendä eş bara. Ğadi keşelärgä internet häm başqa şundıy çeltärlär yärdämendä xakimiätlär belän gel elemtädä torıp, xätta ki qızıqsındırğan sorawğa cawap ta tabıp bulaçaq, dip wäğdä itelä.

Küptän tügel Tatarstan xökümäte häm Rusiä elemtä ministrlığı arasında kileşü imzalandı. Anıñ nigezendä Tatarstan Rusiäneñ mäğlümati häm kommunikativ dairäsenä quşılırğa tieş bula. Tatarstan elemtä ministrı urınbasarı Färit Fazılcanov äytüençä, şuşı kileşü qısalarında başqarılğan eşlär Tatarstan keşelärenä mäğlümati texnologiälärne köndälek tormışta qullanırğa mömkinlek birergä tieş. Elektron poçtanı, xätta ki elektron aqçanı qullanu, yıraqtağı awıllardan da internetqa kerä alu – yaqın kiläçäktä ikän. Şuşı yıl axırına qädär bu yünäleştä eş başlanaçaq, dip äytte elemtä ministrı urınbasarı.

Konferensiädä qaralaçaq mäs’älälär rätendä, tatar telenä dä az ğına urın qaldırılğan. Mäsälän Räis Buxarayev belän Cäwdät Söläymanov fänni törkemnärneñ bersendä tatar telen kompyuterlaştıru mäs’äläse xaqında çığış yasayaçaq, Färit Zahidullin «milli informatizatsiä» xaqında söyläyäçäk, şulay uq, millätara kommunikatsiä problemaları xaqında da ber notıq uqılaçaq.

Älege konferensiä akademik V. Kotelnikovnıñ 95 yıllığına da bağışlanğan ide. Ul radio texnika fänenä nigez salğan keşe bulıp sanala. Şuşı ğalim 1908nçe yılda Qazanda tuğan bulğan, akademik däräcäsenä ireşkän, SSSR fännär Akademiäseneñ vitse-prezidentı bulıp eşlägän. Vladimir Kotelnikov üze isän çaqta häykäl quyılğan siräk keşelärneñ berse. Anıñ sını Qazannıñ Karl Marks uramında tora. Bu konferensiädä cıyılğan ğalimnärneñ kübese Vladimir Kotelnikovnı uqıtuçısı dip sanıy.

Kompyuterlaştıru häm mäğlümatı cämğiätne tözü süzdä genä bulmasın dip, bügen, dönyada tanılğan Hewlett Packard şirkäte Texnik universitetqa häm Mädäniät akademiäsenä $50 meñlek kompyuter sıynıfların büläk itte. Alar yärdämendä fänni konferensiälär, olimpiadalar ütkärergä, elektron uqıtu programmaları nigezendä zamança belgeçlär äzerlärgä mömkin bulaçaq.

Bikä Timerova.

XS
SM
MD
LG