Uzğan xäbärlärebezdä söylägänebezçä älege üzgäreşlär parlamentnıñ tözeleşenä qağıla häm Däwlät Şurası deputatlarınıñ sanın 50dän 100gä qädär arttıru; deputat eşçänlegenä bäyle çikläwlär turındağı normanı yaña redaksiädä bäyän itü; Däwlät Şurasınıñ wäqälätlären waqıtınnan alda tuqtatqanda saylawlarnı 120 könnän dä soñğa qalmıyça ütkärüdän ğibärät. “Professional' daimi nigezdä eşläwçe Däwlät Şurası deputatları sanı turındağı” qanun proyektına da plenar sessiäneñ uzğan utırışında 1 uqılışta qabul itkändä açıqlıq kertelde inde. Daimi eşläwçe “keçe parlament”ta 20 deputat bulaçaq. Däwlät Şurasına kiläçäk saylawlarnıñ waqıtı açıqlandı - saylawlar 14nçe marttağı Rusiä prezidentı saylawları belän bergä ütkäreläçäk. Düşämbe könne Däwlät Şurasınıñ Prezidiumı utırışında 17nçe sintäbergä bilgelängän 18nçe plenar sessiäneñ kön tärtibe täğäyenlände. “Östämä 13 mäs'älä kertelde”-dip xäbär itälär räsmi mäğlümat çaraları. Läkin berençe çiratta parlament eşçänlegenä bağışlanğan qanun proyektların ikençe-öçençe uqılışlarda qarap tikşerü bulaçaq. Çönki aldağı saylawlar 2004nçe yılnıñ 14nçe martına bilgelängän oçraqta saylawlarğa bäyle qanunnarğa tieşle üzgäreşlärne kertü reglamentın tieşençä ütärgä kiräk.
Däwlät Şurasınıñ 18nçe plenar utırışınıñ kön tärtibennän prezident sorawın ütäp “Tatarstan Respublikasında mäğlümati resurslar häm mäğlümatlaştıru turındağı mäs'älä töşerelep qaldırıldı. Prezident xatında äytelgänçä “bu qanunnı tormışqa aşıru bilgele ber çığımnar taläp itäçäk, ä anıñ finans yağı älegä eşlänep betmägän”.Yunıs Ätnäle.
