Accessibility links

Tatarstanda uraq tämamlana...


Tatarstanda cılı häm qoyaşlı könnär tora. Bıyılğı közneñ äbilär çuağı, bik qısqa ğına bulır yäki bötenläy bulmas dip qurqıtsalar da, şaqtıyğa suzıldı äle. Tizdän başlanaçaq ozaqqa suzılğan salqın könnär aldınnan tabiğätneñ mondıy bülägenä härkem dä şat älbättä. Läkin älege matur hawa torışına bigräk tä awıl xucalığı tarmağında eşläwçelär räxmätle. Çönki sintäber citü belän ük başlanğan salqın, yañğırlı könnär respublikada bıyıl uñğan mul uñışnı cıyıp beterergä mömkinlek birmäde. Şuña kürä xäzer basu-qırlarda eş bik qızu bara. Tatarstanda bıyıl da şaqtıy mul uñış cıyıp alırğa ömetlänälär. Respublikanıñ awıl xucalığı ministrlığı mäğlümatlarına qarağanda, börteklelärneñ uñışı 5 million tonna bulır dip kötelä. Älege köndä urtaça alğanda Tatarstan qırlarınnan gektardan 32 sentner aşlıq alına. Xäyer, bu kürsätkeç xätta 50 sentnerdan da artıp kitkän rayonnar bar. Östäwenä awılda inde bäräñge, çögenderne dä cıya başladılar, qışqa äzerlek eşläre dä däwam itä. Şuña da, awıl eşçännäre mondıy qorı, cılı könnär ozağraq däwam itsen dip teli.

Respublikanıñ başqa tarmaqlarında da eşlär tuqtap tormıy, kiresençä, şaqtıy aktiv bara. Cäyge torğınlıq, yallar çorı uzıp bara, nıqlap, torışıp eşlär waqıt citte. Qazan çärşämbe könne berniçä konferensiä, cıyılışlar açıldı. 17-18nçe sintäber könne Rusiäneñ İdel buyı federal’ okrugınıñ farmatsevtları başqalabızda cıyılıp, darularnı litsenziäläw häm standartlaştıru turında kiñäşläşäçäk. Şulay uq 17nçe sintäberdä Qazanda xezmätne saqlaw buyınça Bötenrusiä kiñäşmäse dä uzdı. Anda sotsial’ iminiät fondı, xezmät häm sotsial’ üseş ministrlığı wäkilläre, xezmätne saqlaw buyınça belgeçlär qatnaştı. Çärşämbe könne Qazannıñ fizik-texnik institutında da ber qızıqlı çara uzdı. Anda elektron rezonansnı üsterü eşendä aldınğı kürsätkeçlär öçen fizik Evgeniy Zavoyskiy isemendäge xalıqara premiäne tapşırdılar. 1991nçe yılda ğämälgä quyılğan älege büläk tiz arada xalıqarağa äylände. İsegezgä töşerep ütik, bu premiä elektron rezonansnı berençe bulıp tapqan Qazan ğalime Evgeniy Zavoyskiy isemen yörtä. Anıñ laureatları här yılnı Qazanğa kilep, Tatarstan xökümäteneñ qunağı bulıp kitä. Bıyıl laureat bulıp Amerika ğalime Ueyn Xabbel saylanğan.

XS
SM
MD
LG