Accessibility links

җомга, 9 декабрь 2016, Казан вакыты 07:01

Elekke NATO komandirı Wesley Clark AQŞta prezidentlıq köräşenä quşıldı


Pensiädäge Amerikan generalı Wesley Clark kiläse yılda uzaçaq prezident saylawlarında nazmät bularaq qatnaşıp Aq Yortta xäzeerge prezidentı George Bushnı almaştırırğa cıyınuı turında belderde.

Clark bu belderüen üzeneñ tuğan şähäre Little Rockta yasadı:

AUDİO: Minem isemem Wes Clark. Min Arkanzastağı Little Rocktan. Häm min monda Amerika Quşma Ştatları prezidentı bulu öçen köräşergä cıyınuımnı iğlan itäm.

Clark ayıruça 1999-nçı yılda Kosovonı bombalağan NATO köçläreneñ yuğarı citäkçese bularaq dan qazandı. Añarçı ul 92-nçe 95-nçe yıllardağı Bosniä suğışın tuqtatu öçen diplomatik tırışlıqlar alıp barğan ide.

Çığışı belän elekke AQŞ prezidentı Bill Clinton kebek ük Arkanzas ştatınnan bulğan Clark bıltır Waşingtonnı BMOdan fatixa almıy torıp Ğiraqta suğış başlamasqa çaqırdı häm monıñ belän yañadan matbuğatnıñ iğtibar üzägendä buldı.

Säyäsi küzätüçelär fikerençä, il xalqı xalıqara terrorçılıqtan qurqınıç yanıy dip isäplägändä demokratlar namzäte Clarknıñ xärbi häm diplomatik täcribäse aña saylawlarda zur östenlek birer ide.

Cato İnstitutınıñ eçke säyäsät belgeçe Patrick Basham:

AUDİO: Tışqı säyäsättä yäki xärbi ölkädä täcribäse bulmağan küp kenä demokrat namzätlärdän ayırmalı bularaq, Wesley Clarknıñ härkemnekennän köçleräk ütkäne bar. Häm ul xärbi, saqlanu, milli iminlek mäs''äläläre turında tormış täcribäsendä tayanıp äytä ala.

Ämma Clark prezidentlıq köräşenä şaqtıy soñ kerde. Demokratlar nazmäte bulırğa teläwçe başqa 9 namzät saylawlar öçen aqça cıyu, agitatsiä eşlärenä inde küptännän başlap cibärde. Häm küzätüçelär fikerençä, bu yaqtan ul üz köndäşlärenä ottıra.

Şulay da ul saylaw aldı köräşen bötenläy ük buş kesä belän başlamıy. İnternetta anı yaqlawçılarnıñ häm anıñ saylaw aldı köräşenä aqça birergä äzer buluçılarnıñ küp ikänlege açıqlandı. Matbuğat çaraları Hollywoodnıñ da aña aqça belän yardäm itü mömkinlege turında xäbärlär tarattı. Monnan tış Clarknıñ saylawlar komandasına Clintonnı Arkanzas gubernatorı wazıyfasınnan prezident känäfienä kütärgän küp kenä säyäsi belgeçlär kerä.

Clark kiçäge oçraşuda Amerika citäkçelegen almaştırırğa teläwçe uñ yaqqa da sulğa da möräcäğät itep urtaçıl säyäsätçe bularaq çığış yasadı:

AUDİO:Ni öçen Amerika 2.7 million eş urının yuğalttı? Ni öçen Amerika 5 trillion profitsit mömkinlegen yuğaltıp anıñ urınına kön dä arta bariçı 5 trillion defitsitlı buldı? Ni öçen Amerika dönyada şul qädär küp keşeneñ xörmäten yuğalttı?

Clarknıñ tıñlawçıları bolar öçen Bushnı ğäyepläde.

Xäzerge waqıtta töp demokratik namzät sanalğan, elekke Vermont ştatı gubernatorı Howard Dean Ğiraq suğışın tänqitläw belän saylawçılar iğtibarın cälep itte. Ämma küplär fikerençä, elekke tabib Dean xärbi häm tışqı säyäsät täcribäse bulmaw säbäple iminlek mäs''älälärendä Bush belän yarışa almıyaçaq. Dean belän Clark berniçä märtäbä oçraşıp bu turıda söyläşüläre turında belderde. Deannıñ Clarknı vitse prezident bulırğa çaqıruı turında da xäbär itelä. Clark Dean ciñep çıqqan oçraqta vitse prezident bulırğa rizalıq beldersä bu Deannıñ pozitsiäsen şaqtıy köçäyter ide. Saqlanu häm iminlek mäs''älälärendä genä tügel, suğışqa qarşı pozitsiä nığır ide.

Ber yıl elek AQŞ Senatınıñ Qorallı Köçlär Komitetında Ğiraq mäs''äläsendä Clark ikelänmiçä Bushqa qarşı çığıp, Ğiraq suğışına aşqınmasqa, äl-Qaidägä qarşı köräşne, terrorğa qarşı suğışta xalıqara berektäşlek tözüne däwam itärgä çaqırdı. Clarknıñ ul fikeren başqa küp kenä yuğarı xärbiläre dä yaqlap çıqtı.
XS
SM
MD
LG