Accessibility links

якшәмбе, 4 декабрь 2016, Казан вакыты 11:22

Arafat cünle citäkçe bula almadı dip isäpli Quşma Ştatlar prezidentı


Amerika Quşma Ştatları prezidentı George Bush berençe märtäbä, ul üze zur ömetlär bağlağan Yaqın Könçığış solıx söyläşüläreneñ körçekkä terälüwen tanıdı. Anıñ süzlärenä qarağanda, monıñ öçen berençe çiratta fälästin citäkçese Yäsir Arafat ğäyeple. George Bush, "ul üzen cawaplı citäkçe itep kürsätä almadı" dip belderde.

Amerikan prezidentı şuşı süzlären Quşma Ştatlarğa säfär belän kilgän iordan patşası Ğabdullanı kürep söyläşkännän soñ, anıñ belän bergä Camp Davidta ütkärgän matbuğat oçraşuwında äytte. Anıñ fikerençä, Waşington tarafınnan yaqlanğan fälästin premyerı Mäxmüt Abbasnıñ iminlek urnaştıru tırışlıqlarına näq menä Arafat kirtälär qorıp torğan. Bilgele bulğança, şuşı ayda Abbas fälästin iminlek köçläreneñ kemgä buysınuwı mäs''äläsendä Arafat belän kileşä almıyça urınınnan kitüwen beldergän ide. "Premyer Abbasnıñ bar tırışlıqları da elekke tärtip, dimäk Arafat tarafınnan yuqqa çığarılıp kilde, şuña kürä dä bez xäzer körçekkä teräldek" dip belderde Camp Davidqa cıyılğan xäbärçelärgä Quşma Ştatlar prezidentı. Anıñ şuşı süzläre Aq yortnıñ xäzerge waqıtta Yaqın Könçığış mäs''äläsendä anıq ber qaraşqa kilmäwen kürsätä. Üz çığışında Bush yaña fälästin premyerı Äxmät Qıraynı ğomumän telgä dä almadı, Waşington aña qarata älegä üz mönäsäbäten belderergä bik aşıqmıy. Gärçä yaña premyer bu könnärdä fälästin xökümäten qoru eşläre belän mäşğül. Läkin amerikan yağı Mäxmüt Abbas kitkännän soñ üzeneñ Yaqın Könçığışta andıy waq-töyäklär belän xäzer şöğellänergä cıyınmawın kürsätergä teli sıman. Bush barı tik elekke taläben, fälästinnär yağınnan terror tuqtatılırğa tieş digänne qabatlap, "fälästin xalqı ägär dä ul tınıç tormış teli ikän, üzendä terrorğa qarşı köräş alıp baruğa 100 protsent tuğrı bulğan citäkçelek urnaştırırğa tieş" dip belderde. "Arafat üzeneñ moña sälätle bulmawın kürsätte" dip däwam itte Quşma Ştatlar prezidentı häm, fälästin citäkçelegenä yaqın kiläçäktä terrorğa qarşı köräş eşenä birelgän keşelär kiler häm bez şunnan soñ şul köräştä köçlärebezne berläşterä alırbız" digän ömet belderde. Şuşı süzlärdän añlaşılğança, Aq yorttağı respublikan citäkçelege fälästin idaräsendä Arafat qalğan xäldä anıñ belän eş itärgä cıyınmawın kürsätä. Solıx söyläşülärendä töp aradaşçı bulğan Quşma Ştatlardan İzrail monı inde küptännän teli ide, Könbatış Yardağı yähüd utarları häm İzrailneñ üzendä oyıştırılğan şartlawlar barı tik Arafatnıñ qul quşırıp utıruwı arqasında ğına buldı dip isäpli premyer-ministr Ariel Şaron tirälege. İzrail xökümäte xätta Arafatnı Könbatış Yardan quu, anı yuq itü ixtimalların tikşerüwen dä bäyän itte. Bu anıñ fälästinlelär arasında kiresençä abruyınıñ tağın da artuwına ğına kiterde. Täräqqiatneñ şul yuldan kitüwe Waşingtonnı tağın da qatlawlıraq xäldä qaldırdı. Beryaqtan ul Arafat belän bik ük eş itärgä telämäwen kürsätä, ä ikençe yaqtan anı tulısınça kire dä qağa almıy, çönki ul oçraqta Quşma Ştatlarnıñ Yaqın Könçığıştağı töp östenlege - här ike yaq belän dä bertigez, taraflarnı almıy söyläşä alu mömkinlege yuqqa çığa. Ä anı bu aradaşlıq eşendä almaştırırlıq başqa köç älegä yuq.

Kärim Kamal, Praga
XS
SM
MD
LG