Accessibility links

якшәмбе, 4 декабрь 2016, Казан вакыты 03:03

WSJ: Putinnıñ imperiäçel ambitsiälärenä qarşı toru


AQŞ häm Rusiä prezidentları George Bush belän Vladimir Putinnıñ kiläse atnağa bilgelängän oçraşuı aldınnan matbuğatta Waşington Mäskäw mönäsäbätlärenä iğtibar arta bara. Bu uñaydan Wall Street Journalda Putinnıñ imperiäçel amtibsiälärenä qarşı toru dip atalğan mäqälä basıldı.

Kiläse atnada Bush tağın ber märtäbä Putinnıñ küzlärenä tutırıp qarıy alaçaq dip yaza gazeta. Mäğlüm bulğança, berençe şundıy oçraşudan soñ Bush Putinnıñ küzlärenä qarap anıñ küñelen yaxşı öyränüe, anıñ ışanıçlı keşe buluın açıqlawı turında äytkän ide. Ämma ul oçraşudan ayırmalı bularaq monısında AQŞ prezidentı Sovetlar Berlege tarqaluınıñ inde täğäyen häm kireqaytarğısız buluın açıqlarğa tieş di mäqälä aftorı Vladimir Socor. Socor Waşingtondağı aldınğı strategik häm säyäsi tikşerenülär İnstitutındağı citäkçelärneñ berse.

Anıñ fikerençä, xäzer Putinğa 3 möhim närsäne añlatu zarur. Berençese Mäskäw Gruziä belän Moldovanı yañadan üzenä buysındıru omtılışların tuqtatırğa tieş. İkençese Kaspiy neften häm gazın Yewropağa qudıru Rusiä monopoliäsendä bulmayaçaq. Häm soñğısı, Ukraina häm Belarusnı Rusiä citäkçelegendäge Euraziä İqtisadıy Berlege qısalarına bikläp quyu, şunıñ belän Yewropanıñ bu öleşendä, NATO hämYewropa Berlegeneñ yaña çikläre buyında Mäskäw kontrolen torğızuğa yul quyılmayaçaq.

Putin bu maqsatlarnı üz planınıñ iñ möhim öleşlärennän berse itep kürä. Ämma ul älege illärdä barı tik Könbatışnıñ uñışsızlıqqa duçar buluı aşa ğına ciñä alaçağın añlıy. Ul şundıy säyäsi uñışsızlıqtan Europa häm Quşma Ştatlar öçen iqtisad, iminlek mäs''äläläreneñ qatlawlanuın kötä.

Mäskäwneñ bu yünäleşlärdä ciñügä ireşüe Yewropada salqın suğıştan soñ urnaşqan wäzğiätne üzgärtäçäk, Könbatışnıñ Rusiädän kilüçe energiä çığanaqlarına bäylelegen arttıraçaq, Mäskäwgä ul telämägändä elekke sovet illäreneñ AQŞ citäkçelegendäge koalitsiälärgä quşıluın buldırmaw mömkinlege biräçäk dip yaza gazet häm mondıy misallar kiterä. Bez inde Mäskäwneñ niçek itep Ärmänstannı häm Üzäk Aziädäge berniçä ilne üz yağına awdarıp alarnıñ Ğiraqnı İrekländerü Operatsiäsen xuplamawına ireşüen kündek. Mondıy xällärneñ qabatlanuı NATOnıñ terrorğa qarşı köräşü yäki tınıçlıq urnaştıru mömkinleklären çikliäçäk dielä WSJnıñ 19-nçı sintäber sanında çıqqan, Putinnıñ İmperiäçel ambitsiälärenä qarşı toru digän mäqälädä.

Naif Aqmal, Praga.
XS
SM
MD
LG