Accessibility links

Кайнар хәбәр

Bagdadta yaña şartlaw - Ğiraqta köç qullanular däwam itä


Ğiraqtağı wäzğiatne säyäsi qısalarğa salu tırışlıqları könnän-kön arta barsa da, anda köç qullanu oçraqları hiç kimemi, xörmätle tıñlawçılar. Düşämbedä Bagdadta Berläşkän Millätlär Oyışmasınıñ Ğiraqtağı idaräse urnaşqan bina yanında yänä bomba şartladı. Şimbä köne isä anda ilneñ waqıtlı idarä şurası äğzası qatı yaralanğan ide. Atna azağında törle bäreleşlärdä häm höcümnärdä berniçä amerikan ğäskärie hälak buldı.

Saddam xakimiatennän azat itelügä inde yartı yıl waqıt ütügä qaramastan Ğiraqta amerikan ğäskärlärenä häm alar belän xezmättäşlek itüçelärgä qarşı höcümnär kimemi. Düşämbe dä çığarma bulmadı - intihar höcümçe Berläşkän Millätlär Oyışmasınıñ Bagdadtağı idaräse yanında bomba şartlatıp, andağı iminlek xezmätkären üterde. Tağın 17 keşe, alarnıñ küpçelegen binanı saqlağan ğiraqlılar täşkil itä, törle däräcädä cäräxätlär aldı dip xäbär itelä. Quşma Ştatlarnıñ Ğiraqtağı xärbi köçläre wäkile Sean Kirley:

Audio, Sean Kirley

"Maşinada şartlağan bomba ike keşene, höcüm itüçene üzen häm anda şul çaqta bulğan ber ğiraqlı saqçını üterde, yaralanuçılarğa tieşle däwalaw kürsätelä, berektäşlärneñ häm cirle iminlek köçläre şul tiräne çolğap aldı, bomba BMO binasınnan yaqınça 250 metr yıraqlıqta şartlatıldı" dip añlata wäzğiatne amerikan köçläreneñ matbuğat wäkile. Berläşkän Millätlärneñ Bagdadtağı idaräsenä höcüm berençe märtäbä genä yasalmıy, 19-nçı avgustta bulğan ber şartlaw anda 22 keşene üterde. Hälak bulğannar arasında oyışmanıñ Ğiraqtağı wäkilege citäkçese Sergio Vieira de Mello da bar ide. Şimbä könne bilgesez qorallı keşelär, Ğiraqnıñ amerikannar tarafınnan bilgelängän Waqıtlı idarä şurası äğzası Aquila äl-Xäşimigä höcüm itep, anı qatı yaraladı. Şunnan soñ aña ike qatlawlı operatsiä yasaldı, anıñ xäle xäzer totrıqlı bulsa da, bik citdi dip xäbär itelä. Moña qädär Ğiraqta waqıtlı idarä şurası äğzalarına höcümnär älegä yasalğanı yuq ide, Xäşimi şuradağı öç xatın-qıznıñ berse. Ul kiläçäktä ilneñ Berläşkän Millätlär Oyışmasındağı wäkile bulır dip farazlanğan ide. Älege höcüm öçen cawaplılıqnı Waqıtlı idarä şurasınıñ xäzerge räise Äxmät Çäläbi elekke xakimiat qaldıqlarına yökläde. Şulay itep höcümnär ildäge amerikan köçlärenä genä tügel, alar belän xezmättäşlek itkän cirle räsmi wäkillärgä dä yasala başladı. Uzğan ayda Näcäf şähärendä kürenekle şığıy ruxanie Möxämmäd Bäker äl-Xäkim üterelgän ide, anıñ qärdäşe Ğäbdelğäziz äl-Xäkim şulay uq Waqıtlı idarä şurası äğzası bulıp tora. äl-Xäkim tarafdarları anıñ üleme öçen berençe çiratta amerikannar ğäyeple, çönki alar Saddamnı bärep töşergännän soñ ildä tieşle däräcädä iminlek tä''min itä almadı dip belderä. Läkin ikençe yaqtan yaña xakimiat belän xezmättäşlek itkän ğiraqlılar cämäğätçelekkä monı bik kürsätergä telämi, şuña kürä dä amerikannarnıñ alarnı yaqlawı bik qulay tügel. Bügenge Ğiraqta iminlek urnaştıru, cinayätçelek belän köräş alıp baru iñ möhim burıç bulıp qala.

Kärim Kamal, Praga
XS
SM
MD
LG