Accessibility links

Кайнар хәбәр

Bushnıñ BMOdağı çığışı Ğiraq mäs''äläsendä pozitsiälärne üzgärtmäde


AQŞ prezidentı George Bush dönyadağı iñ möhim diplomatik säxnägä çığıp Ğiraqnı terrorğa qarşı suğışta üzäk front, Yaqın Könçığıştağı totrıqlılıqnıñ töp çığanağı dip atadı häm tağın ber märtäbä Ğiraqta yardäm itüne soradı. BMO ğömümi cıyınına möräcäğätendä Bush Säddam Xösäinne bärep töşerü operatsiäsen aqlap, xäzer dönyada iminlek arttı dide. Amerikan prezidentı Waşingtonnıñ soñğı yartı ğasırdağı iñ külämle tözekländerü eşenä alınuın äytep, başqa däwlätlärne dä Ğiraqtağı tözekländerü eşlärenä quşılırğa çaqırdı.

AUDİO: Min Kongresstan Ğiraqtağı eşçänlek öçen östämä aqçalar bülep birüne soradım. Bu Marşal Planınnan soñ şundıy finans yardämeneñ iñ zurısı bulaçaq. Ğiraqnı irekländerergä yardäm itep bez Ğiraqqa wäğdälärebezne ütibez häm Ğiraq xalqına totrıqlı häm tınıç il tözergä yardäm itep bez üz ilebezdä dä iminlekne arttırabız.

Bush Ğiraqta xakimiätne ğiraqlılarğa aşıqmıyça, tärtip belän demokratik protses aşa tapşıru kiräklege turında söyläde.

Ämma suğışqa qarşı diplomatik kampaniäne citäklägän Fransiä prezidentı Jackues Chirac ğiraqlılarnı suverenitetnıñ üzlärenä tiz arada tapşırılaçağına ışandırırğa kiräk dide. Ğömümi cıyında yasağan çığışında Chirac xakimiätne alarğa tapşıru realistik qısalarda bulırğa tieş, bu eştä BMO zur rol'' alırğa tieş dip äytte.

Soñraq ike prezident üzara oçraşıp söyläşte. Ämma anda da ike citäkçeneñ pozitsiäläre yaqınaymadı.

Xäzerge waqıtta Ğiraqta 140 meñläp amerikan soldatı tora. Anda iminlek saqlaw, yardäm öçen milliardlarça dollar aqça bülengän. Üzara oçraşuda Bush yañadan xakimiätne aşıqmıyça bilgele ber tärtip belän tapşıru kiräklege turında äytte. Chirac isä älege oçraşudan soñ jurnalistlarğa Ğiraqtağı okkupatsiäne ozaqqa suzunıñ qurqınıçlı yaqları turında süz alıp baruın äytte:

AUDİO: Wäzğiät şundıy ki, borınğı mädäniätkä, zur tarixqa iä bulğan borınğı xalıq Ğiraqlılar öçen okupatsiädä bulu ğömümän bik qıyın märsä. Bu wäzğiätne tağın da naçaraytırğa mömkin.

Chirac xalıqara cämäğätçelekneñ suverenlıqnı alarğa tapşırırğa teläwen belderüe zarur dide:

AUDİO: Bu 3 ayğamı, 6 ayğamı, 9 ayğamı suzılır, anısın min tögäl genä äytä almıym. Ämma bez bügen ük qarar qabul itärgä tieş dide Fransiä prezidentı.

Amerikan prezidentı qayber illärneñ citäkçeläre belän ayırım oçraşularnı däwam itä. Alar arasında Ğiraq suğışına qaşrı bulğan Germaniä kanslerı Gerhard Schroder dä, Hindstan häm Paqstan citäkçeläre dä bar.

Naif Aqmal, Praga.
XS
SM
MD
LG