Accessibility links

җомга, 9 декабрь 2016, Казан вакыты 16:35

Kiläse yıl başınnan Tatarstanda migratsiä inspeksiäse eşli başlayaçaq...


Migratsiä qanunnarı soñğı arada şaqtıy qırıslandı. Yaña tärtiplär Rusiä çigen uzuçı keşelärdän maxsus dokument tutırunı, eş häm yäşäw urını bulunı taläp itä. Yaña wazifalar östälü säbäple migratsiä xezmäte dä üzgärtep qorıla. Äle küptän tügel genä, Tatarstan eçke eşlär ministrlığında migratsiä mäs’älälären bağuçı yaña citäkçe bilgelände. Tatarstanda eşläwçe migratsiä xezmäte bermä-ber artırılıp, kiläse yıl başınnan migratsiä inspeksiäsenä üzgärtelä. Çärşämbe könne matbuğat oçraşuın ütkärgän ministr urınbasarı Evgeniy Däwlätşin şul xaqta xäbär itte. Här çittän kilüçe keşe terkälergä tieş, dide ul. Bügenge köndä Rusiäneñ xezmät häm mäşğüllek ministrlığı çit illärdän kilgän eşçe qullarğa 3 meñlek kvota quya. Bu Tatarstanda eşläwçelär sanın alıp sanağanda, 1% qa da tulmıy. Ägär çit ildän kilüçe keşelär waqıtında terkälep, yäşäw röxsäten almıy ikän, alarnı tärtip saqlawçılar qulğa alıp, ildän quyarğa tieş bula. Ägär Äzerbäjan, Törkiä, Urta Aziä illärennän kilgän eşçelärgä Tatarstanda qanunsız räweştä eş birälär ikän, ul waqıtta eş birüçegä dä, qanunsız immigrantqa da cäza salına. Tözeleşlärdä, bazarda, häm başqa qara eşlärdä eşläwçe keşelär salımnarnı tülämäw säbäple, aqçalar däwlät qaznasına kermi qala. Şunıñ östäwenä uzğan yıl belän çağıştırğanda, çittän kilüçelär arasında cinayätçelek tä 2 tapqır arttı, dide Evgeni Däwlätşin. Tatarstanğa kübesençä Üzbäkstannan, Kazaxstan häm Tadjikstannan keşelär küçep kilä. Alarnıñ 84% – tatarlar, 10% - urıs, häm 6% - başqa millät wäkilläre. «Çit il watandaşlarınıñ Rusiädä yäşäw tärtibe turında»ğı qanun tarixi Watannarına qaytuçı tatarlarğa ber nindi östenlek birmi. Bu xaqta Eçke eçlär ministrı Evgeniy Däwlätşin dä äytte. Çittän qaytuçı tatarlar «mäcbüri küçenep qaytuçı» yäki «qaçqın» statusın alğannan soñ ğına, däwlät yärdämenä ömet itä ala. Ä başqa oçraqlarda, yaqın häm yıraq çil illärdän qaytuçı millättäşlärebezgä Rusiä qanunı tarafınnan başqa çit il watandaşları belän ber uq taläp quyıla.

Bikä Tımerova

XS
SM
MD
LG