Accessibility links

пәнҗешәмбе, 8 декабрь 2016, Казан вакыты 17:13

«Qazan» biüçeläre Samar häm Ul’yanğa cıyına...


Qazan kinoteatrlarında Tatarstan respublikasında Qazaq kinosı könnäre däwam itä. Anıñ qısalarında qazanlılar Qazaq kinematografistları töşergän fil’mnar belän tanışa häm fil’mnarnıñ avtorları belän icadi oçraşularda qatnaşa ala. Şulay uq tatarstanlılarnıñ bu könnärdä kürşe Başqortstan respublikası sänğätkärläreneñ icatı belän tanışırğa mömkinçelekläre bar. Başqalada Stärletamaq rus drama häm Başqortstan däwlät qurçaq teatrları gastrol’läre bara.

Bezneñ sänğät ostaları da üz qazannarında ğına qaynamıylar. Mäsälän, tizdän milli-mädäni üzäk qarşında eşläp kilüçe Qazan biü ansamble artistları da gastrol’lärgä çığıp kitärgä cıyına. Alar Samar häm Ul’yan ölkäsendä çığış yasayaçaqlar. Bu xaqta Qazan milli-mädäni üzäge xezmätkäre Aygöl Barieva menä närsälär äytte.

Bez bu gastrol’lärne inde bik küptän köttek. Alarnı Qazan milli-mädäni üzäge häm Bötendönya tatar kongressı oyıştırdı. Bezneñ ansambl’ alarğa bik bay programma häm qızıqlı programma äzerläde. Biüçelärdän başqa konsertlarda tanılğan cırçılar da qatnaşa. Bez millättäşlärebezne üzebezneñ konsertlarda kötep qalabız.Qazan biü törkeme çağıştırmaça yäş kollektiv. Anıñ älegä däwlät cır häm biü ansambleneñ kebek tarixı da, danı da yuq. Şuña kürä dä, mömkinçelektän faydalanıp, bez Aygöl Barievadan ansambl’ häm anıñ icatı turında söyläwen ütendek.

Qazan biü ansamble 1997nçe yılda ğına Qazan şähäre xakimiäte yärdämendä oyıştırıldı. Anıñ sänğät citäkçese – Çulpan Zakirova. Törkem icatınıñ töp yünäleşläre – milli fol’klor, zamança biülär, step. Kollektiv nigezdä yäş artistlardan tora. Bez bik küp bäygelärdä qatnaşabız. Mäsälän, bıyıl bezneñ ansambl’ İspaniägä, Tayvan’ğa barıp, anda xalıqara festival’lärdä qatnaşıp, annan diplomnar alıp qayttıq.

Şulay itep, Qazan biü ansamble äle yäş buluğa da qaramastan inde şaqtıy abruylı häm bay repertuarlı törkem. Xäzer alarnıñ ostalıqların çit töbäktäge millättäşlärebez dä kürep, bäyäli alaçaq.

Gölnaz İlgizär

XS
SM
MD
LG