Accessibility links

Кайнар хәбәр

Waşington üzeneñ Berlin belän araların yaxşırtu ölkäsendä uñışqa ireşte, Paris belän alğa kiteş zur tügel


Berläşkän Millätlärneñ New Yorkta barğan Ğomumi Mäclesen Quşma Ştatlar citäkçelege, üzeneñ Yevropadağı qayber illär belän araların yaxşırtu maqsatında faydalanırğa telägän ide. Häm ul bu mäs''älädä küpmeder uñışqa ireşte diärgä bula. Ğiraq suğışına kisken qarşı çıqqan Fransiä Waşingtonqa qarata äle haman da qırıs torsa, Germaniä ike il arasındağı qarşılıqlar inde artta qaldı digän qaraşta tora.

Quşma Ştatlar citäkçelegeneñ elekkegä qarağanda yışraq tınıçlıq söyüçän tonda söyläşä başlawın häm äle qayçan ğına tirän qarşılıqlar kiçergän Fransiä wä Germaniä belän aralarnı yaxşırtırğa teläwen prezident Bushnıñ kinät "kügärçen"gä äylänüwe belän genä añlatu bik ğadi bulır ide. Töp säbäplär arasında Aq yortnıñ Ğiraqta torğan sayın kübräk kötelmägän problemalarğa taruwı, andağı ğäskäri yuğaltularnıñ artuwı häm matdi çığımnarnıñ da aldan farazlanğanğa qarağanda yuğarıraq buluwı yata. Şuña da prezident Bush üzeneñ Berläşkän Millätlärdäge çığışında, Ğiraqqa yardäm itü bar xalıqara cämäğätçelekneñ burıçı bulıp tora dip belderä.

Audio, George Bush

"Xäzer inde Ğiraq xalqı bezneñ yardämgä moxtac häm ul moña layıqlı, bar igelekle däwlätlär dä bu eştä qatnaşırğa tieş" dip isäpli Quşma Ştatlar prezidentı. Anıñ Ğomumi Mäcles qısalarında Fransiä häm Germaniä citäkçeläre belän oçraşuwı da näq menä şuşı fiker belän suğarılğan ide. Bıltır Ğiraq suğışına qarşı käyeflär nigezendä yañadan kansler itep saylanğan Gerhard Schroedernıñ, amerikan prezidentı belän yıldan artıq turıdan-turı söyläşülär ütkärgäne bulmadı. İndustrial'' "sigezlek"neñ Eviandağı oçraşuwı barışında german kanslerı Bush belän qısqaça söyläşep kenä alğan ide. Çärşämbe könne New Yorktağı söyläşülärdän soñ isä räsmi Berlin, ike ile arasındağı qarşılıqlarnıñ inde tämam çişelüwen, kiyerenkelek çorınıñ tarixta qaluwın belderä.

Audio, Gerhard Schroeder

"Bez Ğiraq turında söyläştek, häm asılda, ike arada bulğan bar qarşılıqlarnı da artta qaldırdıq. Bez ikebez dä şuña ışanabız, bezgä alğa qaraw kiräk, häm min açıq itep şunı äytä alam, Germaniä Ğiraqnıñ demokratik wä totrıqlı buluwın bik teli" di kansler Schroeder. Anı bu omtılışında prezident Bush ta xuplıy, ul da üzeneñ, Germaniä belän mönäsäbätlärdä yaña säxifä açıp cibärergä teläwen belderä. Oçraşu barışında ul Gerhard Schroederğa, Germaniäneñ Äfğanstanda tınıçlıq urnaştıru tırışlıqlarına yardäm itüwe häm Ğiraq politsiäsen äzerlärgä riza buluwı öçen räxmät belderde. Fransuzlar belän mönäsäbätlärneñ şaqtıy salqın bulıp qaluwı sürätendä Waşingtonnıñ Berlin belän araları çınnan da zur alğa kiteş kiçerä bu könnärdä. Germaniä Ğiraq mäs''äläsendä Quşma Ştatlar belän xezmättäşlek itärgä teläwen kürsätä. Fransiä isä haman da Waşingtonnıñ xalıqara mäydanda üz beldege belän eş itü ğädäten tänqitli häm Ğiraqtağı xakimiatneñ mömkin qädär tizräk ğiraqlılarnıñ üzlärenä tapşırıluwın teli.

Kärim Kamal, Praga
XS
SM
MD
LG