Accessibility links

Кайнар хәбәр

Roman Abramoviç mölkäten satıp Rusiädän kitergä cıyınamı?


Çärşämbedä tanılğan eşquar häm Çukotka gubernatorı Roman Abramoviç Rusiädäge soñğı aktivların sata digän xäbärlär taraldı. Berniçä ay elek ul Aeroflottağı öleşen satıp Angliäneñ Chelasea futbol klubın satıp alğan ide. Xäzer süz Ruskii Alumini kompaniäse turında bara. Qayber belgeçlär fikerençä, 36 yäşlek milliarder, Rusiädäge milegen satıp beterep, ildän kitü turında uylana

Ruskii Aluminii, qısqartıp äytkändä Rusal kompaniäsen Roman Abramoviç, üzeneñ küptänge iptäşe Oleg Deripaska belän 2000nçe yılda tözegän ide. Bu şirkät Rusidäge aluminiinıñ 75 protsenıtn citeşterä. Şuşı yılnıñ berençe yartısında anıñ kereme 2 milliard dollar täşkil itte. Aksiälärneñ 50 protsentı Abramoviçqa buysınğan Millhouse şirkätendä, qalğan yartısı – Deripaska citäklägän Bazovıy elemnt qulında. Taraflar 3 yıl aksiälärne satmaqsa kileşkän ide. Rusiä häm Könbatış matbuğatı yazuınça, xäzer Abramoviç üzeneñ öleşen Deripaskağa satırğa bulğan. Törle mäglümätlärgä qarağanda bu alış-bireşneñ küläme 2-3 milliard dollar çaması.

Şuşı yılnıñ martında Abramoviç Aeroflottağı 26 protsent aksiäsen Milli Rezerv Bankına sattı. April ayında anıñ Sibneft kompaniäse belän Yukos arasında berläşü turında kileşü tözelde. Bu kileşü nigezendä Yukos Sibneftne üzläşterä, ä Sibneft aksionerları Yukosnıñ 26 protsent aksiäsenä östäp 3 milliard dollar ala.

Bu akçalarnı Abramoviç bik tä üzençälekle räweştä tottı. Berniçä yöz million dollarğa ul Angliäneñ Chelsea isemle futbol klubın satıp aldı häm aña yaxşı uyınçılar cıya başladı. Bu uñaydan aña, çit il klubın alğançı, berär Rusiä komandasına yärdäm itsä yaxşıraq bulır ide, digän tänqit süzläre äytele. Tanılğan xokkeist, Rusiäneñ xäzerge sport ministrı isä, futbol klubın alğançı, NHLnıñ berär xökkey komandasın alıp, anda Rusiä uyınçıların tuplaw naçar bulmas ide digän fiker ıçqındırdı.

Rusaldağı öleşen satudan kilgän aqçağa Abramoviç närsä eşlär, älegä bilgesez. Şul uq matbuğat yazuına qarağanda, ul Kanadanıñ Vancouver Canucks isemle xokkey klubın satıp alu turında söyläşülär başlağan.

Şuşı közdä Abramoviç Ruspromavto şirkätendäge aksiälären dä sataçaq digän xäbärlär bar. Belgeçlär fikerençä, tağın ber yıldan ul Rusaldağı öleşen ber milliardqa qimmäträk sata alır ide. Eşquarnıñ üz aktivların aşığıp satuwın, belgeçlär, anıñ Rusiädän kitü niäte belän añlata. Bu fikerne äytüçelär anıñ Angliädä ike yortı buluın häm balalarınıñ ingliz mäktäbenä yörüwen iskä ala. Häm dä Abramoviçnıñ üzeneñ, Çukotka gubernatorı urınına qabat saylanırğa telämäwen iskärtä. Töp säbäplär arasında bügenge Rusiädä oligarxlarğa qarata mönäsäbätneñ qırıslana baruwı, xättä, xosusıylaştıru näticälären kire qaraw niätläre äytelä. Misal itep Yukos kompaniäse tiräsendä bulğan xällär kiterelä. Yänäse ul, "bälädän baş ayaq" milegen aqçağa äyländerep qotqarıp qalırğa teli.

Tik menä Abramoviçnıñ şuşı ğämällär yuğarı dairälär belän kileştermi genä eşlängänenä ışanuwı qıyın. Ni genä äytmä, ul elektän-elek, Kremlgä iñ yaqın torğan eşquarlarnıñ berse ide. ORT telekompaniäsen däwlätläşterü ğämälläre anıñ yärdäme belän başqarıldı. İlneñ iñ ere alumini şirkäten kem qulına birü mäsäläsennän dä Kremlneñ çittä qaluwı ikele. Abramoviç misalı, kiresençä, Kreml belän kileşep eşläwneñ ürnäge, monı añlamağan qayberäwlär öçen sabaq bulırğa mömkin.

Ä inde anıñ aqçası, närsälär satıp alaçağı turında, Rusiäneñ Vedomosti gäzite bolay yaza: bez Abramoviçnıñ tağın närsä alaçağın belmibez, bälki ul qartayğançı futbolistlar alu belän şögelläner. Tik menä ägär ul, dönyanıñ iñ bay keşelärneñ berse bulırğa yärdäm itkän ile öçen, berär Xäyriä Fondı oyıştırmasa – bu bik säyer bulır ide.

Ali Gilmi, Praga
XS
SM
MD
LG