Accessibility links

пәнҗешәмбе, 8 декабрь 2016, Казан вакыты 07:04

Qazanda ximiklarnı tağın kötep qalalar...


Comğa könne Qazanda Mendeleyev isemendäge XVII xalıqara ximiklar konferensiäse üz eşen tämamladı. Dönyanıñ tanılğan ximik-ğälimnären cıyğan älege zur häm märtäbäle cıyılışnıñ yabılu tantanası 26nçı sintäber könne Qazannıñ Zur konsertlar zalında uzdı. Tantanada küptän tügel genä Kievtan Ukrainadağı Tatarstan könnärennän qaytqan respublika premyer-ministrı Röstäm Miñnexanov ta qatnaştı. Ul konferensiädä qatnaşuçılarğa Tatarstan xökümäte häm prezidentı isemennän räxmätlär häm iñ izge teläklär citkerde. Ul şulay uq barlıq cıyılğan qunaqlarnı Qazannıñ meñyıllığına da çaqırdı. Şunısın da äytergä kiräk, bu konferensiä Tatarstanda ğına tügel, ä ğomumän Rusiädä dä iğtibarsız qalmadı. Üzäk mäğlümat çaralarında xätta Qazanda ximiä belän dus yäşilär, respublikada ximiä tarmağı zur üseş alğan digän ruxtağı mäqälälär dä basıldı. Şulay itep, dönyada xäzer Tatarstanda tağın ber alğa kitkän tarmaq turında belälär. Qazanda ximiklar konferensiäse tämamlandı, ä menä tağın ber fänni cıyılış – İdel buyı Urta ğasırlarda dip isemlängän İİ Bötenrusiä konferensiäse comğa könne üz eşen başlap cibärde.

Kievta Ukrainada Tatarstan respublikasınıñ könnäre tämamlandı. Pänceşämbe kiçendä älege çarada qatnaşqan premyer-ministr Röstäm Miñnexanov citäkçelegendäge räsmi delegatsiä Qazanğa qaytıp töşte. Bu könnär qısalarında Kievta zur uñış belän Tatarstan sänğätkärläreneñ çığışı ütte, Ukrainağa KamAZ maşinaların satu turında söyläşülär ütte, dip xäbär itte tatar-inform agentlığı. Röstäm Miñnexanov şulay uq Ukrainadağı tatarlar ictimaği oyışmaları wäkilläre belän oçraşqan. Anda yıraqtağı millättäşlärebezgä yärdäm kürsätü, tatarstannıñ yuğarı uqu yortlarında millättäşlärebezgä belem alu mömkinçelekläre turında süz barğan. Ä 25nçe sintäber könne ike respublikanıñ premyer-ministraları da oçraşıp, üzara xezmättäşlek turında söyläşkännär. Ukrainlılarnı bu könnärdä tatar kuxnyasınıñ täm-tomları belän dä sılağannar.

Sintäber urtalarında Tübän Novgorod şähärendä Berdäm Rusiä VIII Bötenrusiä fänni-sänäğat forumı ütkän ide. Anıñ qısalarında şulay uq televizion tapşırularnıñ Rusiäneñ Salawat küpere dip isemlängän etnik-mädäni, dinara mönäsäbätlärne cayğa salu problemalarına bağışlanğan festival’ uzdı. Anda qatnaşqan Tatarstan jurnalistları da üzläreneñ programmaları belän ciñü yawladılar. Comğa könne İdel buyı federal’ okrugındağı Rusiä prezidentınıñ wäkälätle wäkile Sergey Kirienkonıñ respublikadağı baş federal’ inspektorı Marsel Ğälimärdanovnıñ qabul itü bülmäsendä älege jurnalistlarğa büläklär tapşırıldı. Ciñüçelär arasında Tatarstannıñ barlıq diärlek televidenie kompaniäläre – «Tatarstan – Yaña ğasır», «Tatarstan», «Qazan», «Efir"nıñ icadi törkemnäre bar ide.

XS
SM
MD
LG