Accessibility links

шимбә, 10 декабрь 2016, Казан вакыты 04:09

Ölkän yäştäge keşelärneñ qartlığı şatlıqlımı?


Qaban küle yarında urnaşqan «Baskethall»nıñ binası yıraqtan uq iğtibarnı tartıp torsa da, olılar köne uñayınnan tantanalar şuşı sport sarayına bilgelänmägän bulsa, äbi-babaylarnıñ monda ğömerdä dä kiläse yuq ide. İşek töplärendä, bina yanına taşıp toruçı avtobuslarda aq yawlıqlı äbilär, tormış iptäşlären citäklägän qart abıylar, kükräk tulı medal`lären taqqan suğış veterannarı, çäçlären küpertkän häm eşläpä kigän ölkän apalar kürende. Üz ara söyläşkändä äytkänçä, ölkännärneñ şuşındıy zur häm zamança binanı kürüdän da küñelle buldı. 7 meñ keşe sıydırışlı şuşı sport sarayında buş urınnar yuq ide diärlek. Qotlawlar konsert nomerları belän aralaştırıp bardı.

Başta, massa küläm mäğlümat çaralarına Qazan şähär başlığı Kamil İsxaqov veterannar belän oçraşa, dip iğlan itelsä dä, ölkän yäştägelärne Däwlät Şurası räise Färit Möxämmätşin qotladı. Färit Möxämmätşin Däwlät Şurası räise genä tügel. Ul äle partiä citäkçese dä. Şuña ul veterannarğa isänlek-sawlıq teläp, alarnı saylawlarda aktiv qatnaşırğa çaqırdı.

Ul könne qartlarğa küp cılı süzlär äytelde. Alarnıñ fidaqär xezmäte, suğış häm annan soñğı yıllar iskä alındı. Artistlar alarğa bağışlap cırladı, balalar üz tamaşaların kürsätte.

Ä qartlarnıñ üzläreneñ käyefläre häm xäl-äxwälläre niçek soñ? Tantana başlanğançı, «Azatlıq» radiosı xäbärçese berniçä ölkän yäştäge keşe belän söyläşep aldı. Qartlar tormış awırlığına artıq zarlanmadı, ämma pensiäneñ azlığın barısı da bilgeläp ütte. Aralarında iñ zur pensiä aluçı(2.300 sum), häm aydan ayğa 1 meñ sumğa ğına yäşäwçelär dä buldı. Bäyräm könne qartlar optimistik ruxta bulsalar da, başqa waqıtlarnı alarğa fatir xaqları, darularnıñ, azıq-tölekneñ qimmätlege kebek problemalar belän köräşergä turı kilä.

Räsmi sannar kürsätkänçä, Qazanda bügenge köndä 285 meñ pensioner yäşi. Alarnıñ 2 meñnän artığı 90 yäşne tutırğan bulsa, 22-senä 100 yäştän dä artıq. Bıyıl berençe tapqır, awır xäldä yatuçı qartlarğa material yärdäm kürsätelde, ä 100 yäşen tutırğannarğa darular alar öçen aqça birelergä tieş. Elekke yıllarda böten qartlarğa azıq-tölek, kiräkle tovarlar birelsä, bıyıl bu mäs’älä rayon xakimiätläre, şirkät citäkçelegeneñ qaramağına küçte. Qazan şähär xakimiätläre yalğız qartlarğa ğına aqçalata yärdäm kürsätergä wäğdä itä. Anıñ öçen byudjettan 1,5 mln yarım sum bülep birelgän. Häm az keremle ğailälär öçen rayon byudjetları tağı 700 meñ sumım birergä äzer.

Xalıqara ölkännär köne xakimiätlärneñ genä tügel, ul äle inde üsep citkän balalarnıñ qartayıp bara torğan ata-analarına iğtibar köne dä. Bäyräm belän sezne!

Bikä Timerova.

XS
SM
MD
LG