Accessibility links

якшәмбе, 11 декабрь 2016, Казан вакыты 16:58

Kiläse yılda NATOğa kerergä cıyınğan Slovakiä belän Bolğarstandağı cancallar Brusseldä borçular uyattı


Slovakiä premier-ministrınıñ İminlek xezmäte başlığın urınınnan alu tırışlığı ildä şaw-şu uyattı. Bolğarstan premierınıñ kommunist çorındağı küzläw citäkçesen üzeneñ iminlek kiñäşçese itep bilgeläw niätenä Amerikan ilçese qarşı çıqtı. Şuşı ike waqiğa NATO belän namzät-illär arasında ışanıç buldıru ölkäsendä äle küp problemalar buluın kürsätä

Uzğan ayda Slovakiä premier-ministrı Mikulaş Dzurinda İminlek Xezmäte başlığı Jan Mojzişqa ışanıçın yuğaltuwın, säyäsi häm iqtisadi mänfägätlärdä ğäyepläp, anı wazifasınnan alu niäten belderde. Ämmä xökümät wäkilläre premiernıñ dälillären citärlek dip tapmadı häm aña qarşı çıqtı. Premier aña qarşı çıqqan saqlanu ministrın urınınnan aldı. Bratislavadağı şuşı xällär Brusseldä citdi borçular uyattı. Kiläse yılda Slovakiä NATOğa kerergä cıyına. Alyansqa quşılğannan soñ yäşeren mäglümät belän eş itäçäk keşelär isemlegen näq menä İminlek Xezmäte tözep yata ide. "Jane''s İntelligence Digest" yazuınça, NATO citäkçese George Robertson Slovak räsmiläre belän elemtälärne kimetergä, xättä bu ilne Alyansqa alu qararın çitkäräk quyıp torırğa quşqan. Amerikan häm Britan diplomatları bu bäxästä premier tügel, İminlek Xezmäte yağın adı. Slovakiäneñ "Sme" gäzite xäbärçese Peter Juvarek, diplomatlrnıñ qararın bolay añlata:

Audio (Peter Juvarek)

"Alar İminlek Xezmäte eşen däwam itüwen teli häm Mozişnı moña garantia dip sanıy, ul kitsä däwamlılıq özeler dip qurqalar."

Slovakiä cancalı İminlek räsmien citlätü tiräsendä barsa, Bolğarstanda kiresençä, andıy urınğa şikle keşe quyu belän bäyle. Premier-ministr Saxe-Coburg-Gotha komunistlar çorında şpionlıq belän şöğellängän Brigo Asparuhovnı üzeneñ iminlek kiñäşçese itep quyarğa cıyına. Amerikanıñ Sofiadağı ilçese James Pardew premiernı bu fikeren üzgärtegä çaqırdı. Monıñ faydası bulğanmı yuqmı, läkin xökümät süzçese äytüwenä qarağanda Asparuhovnıñ bilgelänüwe xäzer soraw astında. Zamanında Bolğarstannıñ Küzläw Xezmäte başlığı bulıp eşlägän Asparuhov amerikan ilçeseneñ borçuların kire qağa. Azatlıq/Azat Yevropa radiosınıñ Bolğar redaksiäsenä birgän äñgämäsenä ul bolya dide:

Audio (Brigo Asparuhov)

"1991-dä Bolğarstan kontr-razvedkasın citäklägändä, min Amerika häm bar Yevropanıñ yäşeren xezmätläre belän elemtädä tordım, 6 yıl buyına ber digän xezmättäşlek ittek. Minenmçä, bu küpertülär bezneñ öydäge xällär belän bäyle."

Şuşı ike waqiğa NATO belän Alyansqa kerergä torğan yaña illär arasında ışanıç mäsäläsändä küp sorawlar tudırdı. Bu illärneñ kübesendä, İminlek xezmätlärendä äle dä komunist çorında küzläw belän şögellängän keşelär utıra. NATO räsmilärenä xäzer şul keşelär belän eşlärgä turı kiläçäk. Yarıy, anısı ber xäl. Britan belgeçe Stephen Blackwell süzlärençä, NATO räsmilären tağı da nığraq borçığan näräslär bar, misal öçen bu keşelärneñ cinäyätçelär belän bäyle buluı, yä isä, NATOnıñ yäşeren mäglmätläre başqa illärgä tapşırılu qurqınıçı.

Audio (Stephen Blackwell)

"Oyışqan cinäyätçelek qurqnıç närsä, läkin tağı da yamanrağı – yäşeren mäglümät terrorçılarğa elägä ala, häm alar anı NATO illärenä qarşı qullarğa mömkin."

Bu borçular çınlap ta, urınsız tügel, tik alar namzät illärgä genä qaramıy. Äytik, 2 yıl elek Fransiäneñ ber yuğarı xärbi räsmie NATOnıñ Yugoslaviäne bombalaw turındağı yäşeren plannarın Belgradqa aldan citkergän öçen ğäyeple dip tabıldı.

Ali Gilmi, Praga
XS
SM
MD
LG