Accessibility links

Кайнар хәбәр

İzrail Yaqın Könçığışta üz "Berlin diwarı"n qora... fälästin cirläre xisabına


Fälästin radikallarınıñ höcümnärenä qarşı köräşne törleçä alıp barğan, läkin alarnı haman da tuqtata almağan İzrail xökümäte küptän tügel genä bötenläy yaña ber çara küräçägen - yähüd däwläten fälästin cirlärennän biek ber diwar belän ayıraçağın beldergän ide. Çikneñ qayber urınnarında bu eş inde başlandı da. Läkin Şaron xökümäteneñ şuşı başlanğıçı Könbatış, şul isäptän Quşma Ştatlat tarafınnan da kisken tänqitkä duçar buldı.

Yähüd däwläten fälästin cirlärennän yanağan höcümnär häm törle qurqınıçlardan keşe ütä almaslıq diwar belän yaqlaw ideäse İzraildäge uñçı dairälärdä tuğan ide, xörmätle tıñlawçılar. Xakimiatkä xäzerge premyer-ministr Ariel Şaron kilgännän soñ başta säyer, xätta kölkele dä toyılğan şuşı täqdimneñ tormışqa aşu mömkinlekläre kinät kenä arttı. Berniçä ay elek xökümät qayber urınnarda diwarnı inde qora da başladı. Bu ğäräp wä möselman dönyasında ğına tügel, Könbatışta da, şul isäptän İzrailneñ töp strategik berektäşe Amerika Quşma Ştatlarında da zur tänqitkä säbäp buldı. Eş şunda ki, İzrail xökümäte diwar belän, Könbatış yardağı yähüd utarların da çolğap alrığa niätlänä, ä amerikannar täqdim itkän "solıx yulı"nda fälästin cirlärendä yähüd utarların tözüne tuqtatu qaralğan. İnde bulğannarın diwar belän colğaw fälästinlelärdän yaña cirlärne tartıp alunı, Könbatış yardağı transport bäyläneşläreneñ qatlawlanuwın añlata häm alar monıñ belän hiç kenä dä kileşä almıy, älbättä. Näticädä Quşma Ştatlarnıñ Yaqın Könçığışta solıx urnaştıru omtılışları yaña kirtälärgä duçar itelä. Kürenekle fälästin wäkile Säyeb Erekat bu uñaydan, "ägär dä prezident Bush şuşı diwarnı qoruğa yul quysa, bu anıñ solıx urnaştıru eşendä iñ zur uñışsızlığı bulaçaq, İzrail fälästin cirlären barı tik ber maqsat - Bush yaqlağan fälästin däwläten tözügä ayaq çalu öçen genä ala" dip belderä. Üzeneñ diwar tözügä, döresräge anıñ qayda tözelüwenä rizasızlığın belderep räsmi Waşington İzrailgä aldağı 3 yıl eçendä birergä riza bulğan 9 milliard dollarlıq burıçın kimetergä cıyınuwın xäbär itte. Läkin İzrail xökümäte üzeneñ çärşämbe utırışında, Könbatış yardağı yähüd utarları tiräsendä yaña diwar qoru turında qarar çığardı, şulay itep Ariel Şaron Waşington basımına birelergä cıyınmıy. Fatixa alınğan 45 çaqrımlıq öleşne qoru yaqınça 100 million dollarğa töşäçäk. İzrail fälästinlelärdän biek beton diwar, elektron çitännär, küzätü manaraları belän ayırıla. Bolar barısı da, fälästin cirlärennän İzrailgä törle radikallarnıñ ütep kerüwenä kirtä bulır dip farazlana. Xökümät qabul itkän qararda alayda ber taşlama yasala - Ariel dip atalğan utar yanında diwarda açıq urın qaldırılaçaq, anı älegä İzrail ğäskäriläre saqlap toraçaq. Premyer Şaron diwar qoru mäs''äläsendä amerikannar ğına tügel, ildäge yähüd radikalları tarafınnan da tänqitlänä. Soñğıları fikerençä, İzrailne şulay itep Könbatış Yardan ayırıp quyu anda kiläçäktä yaña yähüd utarları qoruğa kirtä quya. Xökümät utırışında ütä-uñçı millätçel partiälärne wäkillek itkän ministrlar Ariel tiräsendä yaña diwar qoru qararına qarşı çıqtı. Alar monı, yähüd däwläteneñ terror yanawına birelüwe dip bäyäli. Kürenä ki, premyer-ministr Şaron beryulı törle köçlärneñ küñelen kürergä teläp näticädä här yaqtan da tänqitkä genä duçar itelä. Kärim Kamal, Praga
XS
SM
MD
LG