Bu könnärdä Sverdlov ölkäseneñ Severoural'sk şähäre boksit rudaları şaxtalarında ğädättän tış waqiğa bara – Severoural'sk boksit rudası idäräsendä 6 meñläp eşçe eş tuqtattı. 800 şaxtеr menä ike kön inde cir astınnan çıqmıy utıra. Şaxterlarnıñ taläbe ber – xezmät xaqın kütärü. Alar fikerençä, urtaça 13 meñ sum tiräse külämne täşkil itkän xezmät xaqı, Rusiäneñ başqa töbäklärendä ber meñ dollar alıp eşläwçe şaxterlarnıñ xezmät xaqı belän çağıştırğısız. Soñğı öç yıl eçendä şaxterlar qulğa 5-6 meñ sum aqça alıp eşlilär. Yal könnärendä häm eş waqıtınnan tış eşlärgä küp mäcbür itsälär dä, anıñ öçen bötenläy tülänmi. Bu taläplär ütälmi torıp, şaxterlar cir östenä kütärelüdän baş tartalar.
Qayberäwlär fikerençä, bu zabastovkanıñ bötenrusiä külämendäge zabastovkağa äwerelep kitüe ixtimal. Severoural'sk şaxterları Kemerowo, Worquta, Çiläbe häm Rusiäneñ başqa töbäklärendä eşläwçe şaxterlardan alarnıñ bu ğämälen laklawçı telegrammalar aldılar inde. Boksit rudaları şaxtaları qarağan alyuminiy citeşterü xoldingı citäkçeläre bu arada Severoural'sk şaxterları belän oçraşu öçen kilep citärgä tieşlär.
