Accessibility links

сишәмбе, 6 декабрь 2016, Казан вакыты 13:13

Tatarstanda uqıtuçılarnı täbriklilär...


Respublikada tağın bäyräm mäşäqätläre belän yörilär. Rusiädä 5nçe oktäber könne – Uqıtuçılar köne bilgelänep ütelä. Läkin 5se yal könenä turı kilü säbäple, bäyräm çaraların inde comğadan uq ütkärä başladılar. Mäğärif xezmätkärlären hönäri bäyrämnäre uñayınnan här mäktäp, här uqu yortında tantanalı çaralar ütä, täbrikläwlär, cılı süzlär yañğırıy. Näq menä şuşı uñaydan iñ olı, iñ märtäbäle qunaqlarnı ğına cıya torğan Piramida küñel açu üzäge binasında comğa könne köndezge säğät 11dä respublikanıñ 1 meñnän artıq mäğärif xezmätkärläre cıyıldı. Alarnı respublikanıñ Mäğärif ministrı Faris Xarisov, Tatarstannıñ Däwlät Şurası räise Färit Möxämmätşin qotladılar. Şulay uq Uqıtuçılar köne uñayınnan üzeneñ täbrikläw süzlären Rusiäneñ Mäğärif ministrı Vladimir Filippov ta citkergän. Läkin Tatarstan uqıtuçıların ul yıldağıça qotlaw telegramması belän genä tügel, ä videotasmağa yazılğan maxsus täbrikläw belän quandırğan. Tantana waqıtında uqıtuçılarğa matur süzläre genä äytep qalmağannar, ä respublikanıñ häm Rusiäneñ maqtawlı isemnären, maqtaw gramotaların tapşırğannar. Bäyräm çarasında qatnaşuçılarğa qızıqlı konsert programması da kürsätelgän. Qatnaşuçılar arasında isä, SSSRnıñ xalıq uqıtuçısı, 80 yäşlek Änäs Salixov, Mintimer Şäymievnıñ berençe uqıtuçısı Xädiçä Äxmädullina, respublikanıñ başqa kürenekle pedagogları häm mäğärif xezmätkärläre bar ide.

Ä bu kiçä aldınnan, 2nçe oktäber könne, Tatarstannıñ Mäğärif ministrı Faris Xarisov respublikanıñ aldınğı uqıtuçıları belän oçraştı, dip xäbär itä İntertat agentlığı. Oçraşuğa şulay uq mäğärif ölkäsendä eşläwçe xezmätkärlär, ğalimnär da çaqırılğan ide. Bäyräm uñayınnan äzerlängän çäy tabını artında, qunaqlar öçen äzerlängän mädäni tamaşanı qarıy-qarıy, uqıtuçılar ministr belän dä aralaşırğa, aña üzlären qızıqsındırğan sorawların birergä dä onıtmadılar. Bäyräm buluğa da qaramastan, mäğärif ölkäsendäge problemalar haman äle aktual’ bulıp qala birä.

2nçe oktäber könne Qazan narkologiä dispanserınıñ reabilitatsiä üzäge açıldı. Elek üzäk şähärneñ narkologiä dispanserında ğına urnaşqan ide. Urın qısrıq häm caysız bulu säbäple, awırularnı däwalaw ciñel bulmadı. Yaña açılğan binada beryulı 25 keşe däwalana alaçaq. Kiläçäktä bu sannı tağın da arttırırğa digän niät bar, çönki qızğanıçqa qarşı xäzerge köndä respublikada älege zamana çirennän integüçelärneñ sanı arta bara. Açılu tantanasında qatnaşqan respublika premyer-ministr urınbasarı Zilä Wälieva, üzäkne açu cämğiättä narkomaniäne ciñügä ber adım bulıp tora, dide. Tağın ber igelekle ğämäl turında. Tatarstan cir teträwdän zıyan kürgän Altay respublikasına gumanitar yärdäm yulladı. Respublikanıñ premyer-ministrı qararı nigezendä tabiğät qazasına oçrağan altaylılarğa 500 meñ sum aqça cibärelde.

XS
SM
MD
LG