Accessibility links

Кайнар хәбәр

Ölkännär köne Semberdä dä kiñ bilgelänep ütte…


Ölkännär köne Semberdä dä kiñ bilgelänep ütte. Törle şirqätlär üzläreneñ elekke xezmätkärlärenä azıq-tölek öläştelär, qayberläre çaqırıp sıyladılar. Xezmät kürsätü şirqätläre 1nçe oktäberdä taşlamalar iğlan ittelär. Ölkä xaqime Vladitir Şamanov 50 “Oqa” avtomobile öläşte.

“Milli qul'turalarnı torğızu häm üsterü üzäge” digän uçrejdenie muqşı, çuaş, tatar avtonomiäläre citäkçelege belän berlektä qayber veterannarnı çaqırıp sıyladı. Ä menä şäxsi aşxanä xucabikäse Asiä Möleqova üz xisabına 100 çaması äbi-babaynı sıyladı. Xäyer, kiçäneñ töp mäğnäse sıylanu tügel ide. Asiä xanım, nigezdä, yal könnärendä din däresen üzläşterüçe sabaqtaşların çaqırğan. Başta suğışlarda häläk bulğan millättäşlärebez ruxına yäsin çıqtılar, annan soñ Qor'ännän sürälär uqıdılar. Aşaw-eçü mönäcätlär, cırlar belän çiratlaşıp bardı.

Kiçädä qatnaşqan milli xäräkät aktivistları citdi temalar da kütärdelär. “İstinnıye patriotı Rossii” digän firqä wäkile İldus Sibğatullin alda torğan saylawlar turında süz tottı. Milli häm dini partiälärne tıyu arqasında elekke İslam firqäse yaña isem astında terkälergä mäcbür buldı, ämma anıñ qiblası şul uq qaldı, rus bulmağan xalıqlarnıñ mänfäğätlären yaqlaw.

“Bolğarğa qaytu” oyışması räise Şäwkät Bogdanov bolğar babalarıbıznıñ kul'turasın, tarixın öyränergä, şul böek qul'tura häm şanlı tarix belän ğorurlanırğa öndäde.

Mäğärif veteranı Venera Waxitova balalarğa ana söte belän dinebezne iñderüneñ möhimlege assızıqladı. Ul şulay uq Qazandağı “Möxämmädiä” mädräsendä çittän torıp uqu tä'sirläre belän büleşte.

Şulay itep, ölkännärne sıylaw tabını dini, mädäni, xätta säyäsi çara da bulıp çıqtı. Kiçädä qatnaşuçılarğa isä mondıy programma ayıruça oşadı, barısı da bik zur qanäğätlek belän sawbullaştılar.

“Tuğan tel” oyışmasınıñ täpiläp kitüenä zur yärdäm kürsätkän milli xäräkät aktivistı, suğış veteranı 82 yäşlek İskändär ağa Ğizzätullin ike urınğa çaqırılsa da, awıruı arqasında bersenä dä bara almadı. “Tuğan tel” aktivistları anı öenä barıp täbriklädelär.

Ayrat Gayfulla

XS
SM
MD
LG