Accessibility links

сишәмбе, 6 декабрь 2016, Казан вакыты 13:14

İsrael Süriädä terrorçılar buluı şiklänelgän lagerlarnı utqa tottı


Kiçä İsraeldä bulğan terror ğamälenä cawap itep bügen İsraelneñ xärbi oçqıçları İslam Cihadı oyışmasınıñ Süriädäge öyränü lagerların utqa tottı. İsrael Süriä cirenä soñğı 20 yıl eçendä berençe tapqır höcüm itte . İsraelneñ xärbi köçläre idaräse yasağan belderüdä-islam suğışçılarınıñ başqala Damask'tan 15 çaqrım yıraqlıqta urnaşqan lagerları utqa totıldı, dielä. Belderüdä şulay uq, ul bazalarda Hämäs häm İslam Cihadı oyışmaları öyränülär ütä, dielde. İslam Cihadı oyışmasınıñ wäkile Abu İmad Rifai, oyışmanıñ Süriädä suğışçıları yuq, dip belderde. Kiçä İsraelneñ Haifa şähärendä bulğan intixar höcümendä 19 keşe hälak bulğan ide. Höcümne xatın-qız oyıştırğan, anıñ öçen cawaplılıqnı İslam Cihadı oyışması üz östenä alğanı mäğlüm. İsrael Haifa höcümendä fälestinnär citäkçese Yasser Arafatnı ğayepli. Sälämätlek saqlaw ministrı Dany Naveh, beldereünçä, "Cawaplılıq Arafat östendä. Ul terror höcümnären tuqtatır öçen ber ni dä eşlämäde. Kiresençä, ul terror çaralarına yäşel ut birep kilä, köç qullanu öçen ul cawaplı, " dide İsrael ministrı. Fälestin citäkçese Yasser Arafat üze terror ğamälen täñqitläp çıqtı, läkin İsraeldä monnan soñ Arafatnı xakimiättän çitläşterergä digän çaqırular tağın da arttı. Arafatnı ildän quu , xattä üterü turında täqdimnär bar. Süriä bügenge höcüm uñayınnan Berläşkän Millätlär Oyışmasınıñ İminlek Şurasına möräcäğät itergä cıyınuı turında belderde. İsrael isä üz çiratında, ägär dä Süriä terror oyışmalarına yardämne tuqtatmasa höcümnärne däwam itäçägen belderde. Misır prezidentı Hösni Möbäräk, Germaniä kanslerı Gerhard Şröder häm Fälestinnärneñ Xezmät ministrı Ğässaän Xatib İsraelneñ höcümen kisken täñqitläp çıqtı. Misır prezidentı Hösni Möbäräk İsraelne Arafatqa qarşı çaralar kürüdän baş tartırğa öndäp belderü yasadı. Fälestinnär saylağan citäkçegä qarşı çara "tınıçlıq buldıruğa yardäm itmiäçäk" dide Möbäräk. Misır prezidentı bu süzlärne televideniädä İsraelgä qarşı 1973nçe yılğı suğışnıñ 30 yıllığı uñayınnan yasağan çığışında äytte.

XS
SM
MD
LG