Accessibility links

якшәмбе, 11 декабрь 2016, Казан вакыты 16:59

Tatarstanda narkotiklarlar belän köräşü däwam itä


Soñğı yıllarda böten dönyada ayıruça kiñ taralış alğan narkomaniä çire Tatarstannı da çitlätep uzmadı. Dönya belän bäyläneştä torıp, anıñ yaxşı, kiräkle yaqların ğına alıp yäşäp bulmıy şul. Qızğanıçqa qarşı, anıñ tiskäre yaqları, çirläre dä urap ütmi. Şul isäptän, narkomaniä dä. Xäzerge yäş buınnıñ ata-anaları narkotiknıñ närsä ikänen dä belmägän bulsa, alarnıñ balaların inde bu qotoçqıç äfättän yış qına qotqarıp ta qalıp bulmıy. Xäyer, şunısın da äytergä kiräk. Älege awıru belän integüçelärneñ sanı Tatarstanda Rusiäneñ başqa töbäkläre belän çağıştırğanda kimräk. Respublika narkologik dispanserı xezmätkäre süzlärenä qarağanda, bügenge köndä respublika buyınça 7 meñ narkoman xisaplana. Ütkän yılnıñ şuşı uq waqıtı belän çağıştırğanda, bu 1 protsentqa kübräk. Läkin bu bik yaqınça ğına san, bu mäğlümatlarnı äle açıqlarğa kiräk, dide ul. Citmäsä, 7 meñ keşe – ul narkologik dispanserlarnıñ xisaplarında torğan keşelär genä. Ä berqaya da terkälmägän, bälki äle üzen awıru dip sanamağan da narkomannarnıñ sanı tağın da kübräk. Xäyer, yäş buınnıñ älege zamana çire belän yıldan-yıl kübräk awıruın istä totıp, respublikada narkomaniägä qarşı köräş turında onıtmıylar. Törledän-törle çaralar da küp ütä, problemanı xäl itügä aqçalar da yıldan-yıl kübräk birelä. Soñğı arada ğına da bu ölkädä Tatarstanda berniçä iğtibarğa layıq waqiğa buldı. 6nçı oktäber könne Qazanda Narkomaniä häm cämğiät: problemanı çişü yulları dip isemlängän fänni-ğämäli konferensiä açıldı. Anıñ eşendä Rusiäneñ 40 töbägennän kilgän ğalimnär, belgeçlär, tabiblar, pedagoglar qatnaşa. Älege problemanı xäl itü yulları turında fiker alışır öçen Qazanğa Mäskäwdän Sälämätlek saqlaw ministrlığınıñ baş balalar tabibı, narkolog Aleksey Nadejdin, ministrlıqnıñ baş balalar psixiatrı Vladimir Voloşin dä kildelär. Tatarstan xökümäte dä älege fänni cıyılışnı iğtibarsız qaldırmadı. Anıñ eşendä respublikanıñ Däwlät Şurası räise Färit Möxämmätşin, premyer-ministr urınbasarı Zilä Wälieva, respublika ministrlıqları wäkilläre dä qatnaştılar. Tatarstan İminlek Şurasınıñ narkotik matdälär qullanuğa häm anıñ qanunsız äyläneşenä qarşı toru buyınça komissiäse, respublikanıñ Ministrlar Kabinetı qarşındağı xalıq arasında narkotiklar qullanunı buldırmaw üzäge häm Qazan meditsina institutı oyıştırğan bu fänni konferentsiäneñ maqsatları bulıp narkomaniä çirenä qarşı xalıqara häm üzebezneñ täcribäne urtaqlaşu, älege problemanı xäl itüdä xökümät säyäsätenä täqdimnär kertü tora. Läkin respublikada fänni cıyılışlar ütkärü belän genä çiklänmilär. Mäsälän, şuşı könnärdä genä, inde xäbär itkänebezçä, şähär narkologiä dispanserı qarşında eşläp kilüçe reabilitatsiä üzäge öçen yaña bina açıldı. Älege üzäk inde 1999nçı yıldan birle eşli. Läkin bu köngä qädär alar elekkege tulay toraq binasında ğına eş alıp barğannar. Xäzer isä, üzäk xezmätkärläreneñ awırularnı däwalawda da, narkomannarğa bulışu ısulların üsterüneñ dä mömkinçelekläre kiñäyde. Üzäkneñ eşçänlege turında anıñ citäkçese İlsur Ziganşin söyli.

AUDİO

Preodolenie digän isem yörtkän narkomannarnı reabilitatsiäläw üzäge üzeneñ 4 yıllıq eş däwerendä 700dän artıq keşegä yärdäm kürsätkän. İlsur äfände süzlärençä, alar qullarınnan uzğan awırularnıñ yartısı ğına bulsa da terelgän ikän, bu inde 350 keşe xäzerge köndä narkotiklar qullanmıy, digän süz. Ber qarasañ, bu bik keçkenä san. Läkin keşe ğomeren sanağanda az yäki küp digän töşençälär döresme ikän? Xäyer, niçek kenä bulmasın, narkotiklar belän köräşne respublikada äle köçäytergä kiräk. Monıñ öçen bernindi mömkinleklärne dä jällärgä yaramıy.

Gölnaz İlgizär, Azatlıq radiosı, Qazan.

XS
SM
MD
LG