Accessibility links

җомга, 9 декабрь 2016, Казан вакыты 14:31

Severoural'skida qarşılıq çarası däwam itä


Sverdlov ölkäseneñ Severoural'sk şähärendä menä inde altı täwlek buyı şaxterlar zabastovkası däwam itä. Boksit rudalarında eşläwçe altı meñnän artıq keşe eşkä totınmıy, 520 keşe cir astınnan çıqmıy utıra. Yartı ğömerlären cir astında ütkärüçe eşçelärneñ taläbe ber – xezmät xaqın urtaça ber meñ dollarğa qädär kütärü. Bu könnärdä zabastovka yasawçılar yanına Mäskäwdän bäysez profsoyuzlar citäkçese Sergeev äfände dä kilgän ide. Ämma anıñ şaxterlar yanına cir astına töşep söyläşülär alıp baruı bernindi üzgäreşlärgä kitermäde, şaxterlar üz taläplärennän kire qaytırğa uylamıylar. Şul uq waqıtta SUAL alyuminiy xoldingı citäkçeläre, şaxterlar cir astınnan çıqmıy torıp, söyläşülär alıp barudan baş tartalar. Alar fikerençä, xezmät xaqın ber meñ dollarğa qädär arttıru rentabel'lekne yuğaltuğa, aksionerlıq cämğıäteneñ bölüenä kiteräçäk. Sverdlov ölkäseneñ finans ministrı Ğalina xanım Qowalewa äytüençä, Severoural'sk şaxterlarınıñ urtaça xezmät xaqı bolay da 9 meñ tiräse bulıp, Rusiädäge urtaça xezmät xaqı küläme buyınça berençe öç urın arasında tora. Qayber awırraq uçastoklarda ciñ sızğanıp eşläwçe şaxterlar bügen bolay da ber meñ dollar tiräse xezmät xaqı alıp eşlilär. Barısın da tigezläw dä döres eş tügel, dip sanıy Ğalina Qowalewa. Anıñ fikerençä, Severoural'sk boksit rudası eşçeläreneñ bu zabastovkası bernindi qanun qısalarına da sıymıy. Eş xaqın arttıru kollektiv kileşüendä qaralğan. Şaxterlarnıñ xezmät xaqı bu yıl bolay da artaçaq, ämma alar sorağan külämdä ük tügel, dip belderde Ğalina xanım.

Fäwiä Safiullina, Yekaterinbur

XS
SM
MD
LG