Accessibility links

Qazan sölgesen kem qaldırğan?


Qamal tatar drama teatrında 4nçe oktäberdä tamaşaçığa yaña premyera- Kärim Tinçurinnıñ “Qazan sölgese”- muzıykal' komediäse täqdim itelde. 8nçe oktäberdä spektakl' tağın üzeneñ tamaşaçısın qarşı alaçaq. Bu muzıykal' komediäne teatrnıñ baş rejisserı Färit Bikçäntäev säxnäläşterde.

“Qazan sölgese”neñ yazmışı 1924nçe yılda uq başlana. Kärim Tinçurin üze yazıp şul uq yılnı bu spektakl'ne säxnäläşterä.1956nçı yılda anı Rawil Tumaşev , ä 1981nçe yılda Marsel' Sälimcanov säxnägä quya. Läkin 1986nçı yılda din ähellärennän kölü digän fiker taralıp, bik zur tänqitkä duçar bulıp, quyılmıy qala. Häm inde bügenge köngä qädär bu spektakl'ne quyarğa ber rejissernıñ da yöräge citmi.

Ämma zamanalar üzgärä, zamana belän fikerlär dä üzgärä. Färit Bikçäntäev tatar xalqınıñ ruxın, dinen çağıldırğan , xalıqnıñ tormışın kürsätkän teatrnı qabat üzenä qaytaru xise belän xıyallana. Häm bu xıyalı anıñ bıyıl tormışqa aşa.“Qazan sölgese”spektakle qabat dönya kürä. Spektakl' tamaşaçınıñ küñelenä bik xuş kilä.

Spektakl'neñ dekoratsiäsenä kilsäk, awıl tormışın xäterlätkän säxnä, törle töslär ,bizäklär belän matur itep cihazlandırılğan. Sälix Säydäşev muzıykasın orkestr başqara. Orkestrnıñ dirijerı Foat Äbübäker.

Rässamı- Sergey Skomoroxov. Baletmeyster Oleg Nikolayevnı Mäskäwdän çaqırtqannar. Ul Qazan tamaşaçısına “Qara çikmän”, “Ezlädem bäğrem, sine”, spektakl'lärennän tanış inde. Baş rol'lärne: İl'yasnı- Radik Bariev, Mörşidäne- Alsu Kayumova başqara. Spektakl' bik tä qızıq. Rejissernıñ “Öç Salixı”n kertüe, spektakl'ne tağı da canlandıra. Spektakl' şulay, tamaşaçı telägänçä , matur bulıp tämamlanada . Küpme genä söyläsäk tä , üzegez barıp qaramıyça, Qazan sölgesen kem qaldırğanın belä almassız.

Şulay uq Galiasgär Qamal teatrında tamaşaçını tağın ber premyera kötä. Bu premyera Tufan Miñnullinnıñ “Şulay da buldı şul” spektakle.Bu spektakl' säxnägä Marsel' Salimcanovnıñ tuğan könendä 7nçe noyaber könne quyılaçaq.

Ä Ayaz Ğiläcevneñ “Yara” isemle spektaklen Qamal teatrı dekaberdä kürsätäçäk.

Azatlıq radiosı öçen Qazannan Mälikä Basıyr.

XS
SM
MD
LG