Accessibility links

Кайнар хәбәр

Tatarstan militsiäse cinäyätçel törkemnärgä kön kürsätmäyäçäk...


Tatarstannıñ zur şähärlärendä daimi räweştä oyışqan cinäyätçel törkemnär eş itä. Eçke eşlär ministrı Äsxät Säfärov äytüençä cinäyätçelärne faş itü yünäleşendä militsiäneñ iñ täcribäle xezmätkärläre eş alıp bara häm xäzer Çallıdağı «29nçı kompleks», Yäşel Üzän häm Tübän Kamadağı şundıy uq törkemnärneñ cinäyätlären tikşerü tämamlanıp kilä. Läkin mäxkämä belän dä eş tuqtamasqa mömkin. Mäsälän, «Hadi Taqtaş» törkemeneñ cinäyätlären tikşerü 2,5 yıl yarım barıp, inde mäxkämädä qaralsa da, şuşı törkemdäge ayırım keşelärneñ ğämällären raslatu eşe äle dä däwam itä. Här cinäyätçel törkem östendä 60-90 keşe häm yıllar däwamında eşli. Bälkem şuña dä köndälek cinäyätlärgä militsiäneñ waqıtı citmider dä.

Ğomum alğanda ministr, jurnalistlar belän uzğan 9 ayğa näticälär yasar öçen oçraştı. Şuşı waqıt eçendä 43 meñnän artıq cinäyät terkälgän. Bu ütkän yıl belän çağıştırğanda 2,8% azraq. 394 kilogramm narkotik tartıp alınğan, läkin bu ütkän yılğa qarağanda kimräk ikän. Ä iqtisad ölkäsendäge cinäyätlärneñ sanı artqan, mäsälän uzğan 9 ayda däwlätkä 1 milliard sumğa yaqın zıyan salınğan. Awır häm ayıruça awır cinäyätlärne faş itü ütkän yılda 51% bulsa, bıyıl ul san 8% artqan. Rusiäneñ eşçe eşlär ministrlığı şuşı ayıruça awır cinayätlärne açu protsentına qarap, militsiäneñ näticälelegen bilgeli. Häm ministr äytüençä, Tatarstan tärtip saqlawçıları başqa Rusiä töbäkläre belän çağıştırğanda iñ yaxşılarnıñ berse bulıp sanala. Tahiryanov törkemen faş itü dä, ministr äytmeşli Tatarstan militsiäseneñ zur ciñüe.

Yartı yıllap barğan qatı tikşerenülär näticäsendä, soñğı waqıttağı şawşulı cinäyätlärneñ Eduard Tahiryanov törkeme tarafınnan qılınuı açıqlana.

KamAZ Metallurgiä şirkäteneñ citäkçese Viktor Fabernıñ urlanu häm sentäber ayında anıñ mäyete tabılu xäbäre küp keşelärne tetränderde. Şirkät citäkçese däräcäle häm bilgele keşe bulğanğa, anıñ yuqqa çığuı iğtibarsız qala almağan ide. Ä yuğalğan başqa keşelärne ezläwçe dä işetüçe dä kürenmäsä? Ministr Säfärov äytkänçä, Faber häm anıñ urınbasarı Starodubtseva xanımnıñ mäyete tabılğan cirdä Qazannan çıqqan, soñğı waqıtta Mäskäw ölkäsendä eşlägän ber eşmäkärneñ mäyete, äle kiçä genä qazıp alınğan. Viktor Faber häm Elena Starodubtsevanıñ üle gäwdäläre Kama utrawlarında tabıla, şunda uq tikşerüçelär başqa waqıtta yuğalğan eşmäkär Evgeniy Kornev, tağın ber eşmäkär İgor Kurdinovnıñ mäyetlären dä qazıp ala. Ä menä eşmäkär Bulat Bayyazitov isän qala. Anı başqa keşelärne şikelle uq urlıylar, läkin ütermilär. Ul aylar buyı küzlären bäylägän kileş ber fatirda yabılıp utıra. Totıq bulğan fatirnıñ işegenä militsiä bärep kergändä dä anı üterergä ölgermilär. Keşelär urlawnıñ töp maqsatı tuğannarınnan yolım tülätü häm ğomumän şähärne qurqıtıp toru. Faber da üler aldınnan, cinäyätçelär totqan firmalarğa ällä niçä million sumnı küçerüne sorağan. Başqa eşmäkärlärdän dä cinäyätçelär şaqtıy aqça tartıp ala. Läkin bu da alarnı qotqarmıy. Xäzer Tahiryanov törkemennän 31 keşe qulğa alınğan, 9 keşedän çitkä kitmäw xaqında qul quydırtqannar, tağın 8 keşe ezlänä.

Ministr Äsxät Säfärov bu eşne tikşerüdä zur yärdäm kürsätkän öçen Çallı prokurorı İldus Nafikovqa häm başqa prokuratura xezmätkärlärenä räxmät belderde. Alar yärdäme belän genä bu cinäyätçel törkemneñ ezenä çığıp buldı, militsiä xezmätkärläre belän bergä alar da tormışların qurqınıç astına quydı, dide ul.

Ğomum alğanda, ministr fikerençä, qanunnar kübräk cinäyätçelär xoquqların qayğırta. Cinäyätçelärneñ gäyebe raslansa da, alarğa iñ zur cazanı birü awır bulaçaq.

Bikä Timerova.
XS
SM
MD
LG