8nçe oktäber könne kiç belän Sverdlov ölkäse gubernatorı häm xökümät wäkilläre aeroportta Vladimir Putinnı, yartı säğät soñraq Gerxard Şredernı qarşı aldılar. Oçraşu tantanasınnan soñ däwlät kortejı gubernatornıñ şähär artındağı rezidensiäsenä yunälde. Biredä söyläşülärneñ berençe basqıçı bulıp ütte.
Bügen Yekaterinburg filarmoniäse binasında berençe räsmi oçraşular häm çığışlar başlandı. Annan soñ gubernatornıñ şähär rezidensiäsendä däwlätara konsul'tatsiälär, räsmi söyläşülär, häm ike aradağı kileşülärgä qul quyu seremoniäse buldı. Programmada tağın “Peterburg dialogı” dip atalğan cämäğätçelek forumında qatnaşuçı yäşlär belän oçraşu, Rusiäneñ soñğı patşası Nikolay Romanov ğailäse atıp üterelgän İpat'yev yortı nigezenä salınğan “Qan östendäge xram” çirkäwenä ekskursiä qaralğan. Şundıy tığız eş könennän soñ, Rusiä häm Germaniäneñ yuğarı däräcädäge oçraşuı tögällänä. Kiç belän Ural cire yuğarı qunaqlarnı ozatırğa äzerlänä.“Gerxard Şreder belän Vladimir Putin şaxterlarnı cir astınnan tartıp çığardılar”. Sverdlov ölkäseneñ küp kenä basma mäğlumat çaralarında berençe bit mäqäläläre şundıy baş astında başlanıp çıqtı. Çınlap ta, ike zur derjava citäkçeläre oçraşuı yaqınlaşqan könnärdä Sverdlov ölkäse xökümäte wäkilläre cide kön cir astında utırğan şaxterlarnı cir östenä çığarğa künderä aldılar. Zabastovkanı tuqtatu öçen alar şaxterlarnıñ taläplären tiz arada qarap çişärgä, eş normaların kimetergä, xezmät xaqın arttırırğa wäğdä birdelär.
Fäwiä Safiullina.Yekaterinburg.
