Accessibility links

чәршәмбе, 7 декабрь 2016, Казан вакыты 17:31

Tatarstan ministrlıqlarında tatarça söyläşerlärme?


9nçı oktäber könne Tatarstannıñ Eçke eşlär ministrlığında 30 xezmätkär imtixan tottı. Şunısı qızıq, bu imtixan berençe qaraşqa alarnıñ hönäri eşçänlegenä berniçek tä qağılmıy kebek. Alar sınawlarda üzläreneñ tatar telen niçek itep üzläştergänen kürsättelär. Älege 30 keşe Respublika Ministrlar kabinetınıñ Tatarstan xalıqları tellären üsterü bülege tarafınnan oyıştırılğan tatar telen öyränü kursların tämamlawçılar. Çärşämbe könne isä şuşı uq ministrlıqta älege kurslarda uqığan berençe törkemne täşkil itkän 15 keşe imtixan birde. Älege imtixan xaqında bezgä oyıştıruçılarnıñ berse Näcip Şakircanov söyli.

İmtixannar bik uñışlı ğına ütte. Rus qızları hän yegetläre, bötenläy tatarça belmägän keşelär, sınawlar waqıtında matur itep tatarça üzläre, eşläre turında söylädelär, sorawlarğa cawap birdelär. Ğomumän, tatar telen öyränü kursların oyıştıruda Eçke eşlär ministrlığı başqa tarmaqlarğa da ürnäk bulıp torırlıq.



Ağımdağı yılda tatar telen öyrätü kursları barısı respublikanıñ 7 ministrlığında ütte. Şulay itep, Eçke eşlär, Elemtä, Säwdä häm Tışqı iqtisad elemtäläre, Transport häm yul xucalığı, Sälämätlek saqlaw, Sotsial yaqlaw häm Awıl xucalığı ministrlıqları xezmätkärläre, barısı 1 meñnän artıq keşe, 2003nçe yılda Tatarstannıñ ikençe däwlät telen üzläşterde. Älege kurslar turında tulıraq mäğlümat alır öçen bez Tatarstan Ministrlar kabinetınıñ Tatarstan xalıqları tellärne üsterü bülegenä möräcäğät ittek. Bülekneñ töp referentı Färit Gäräev bu xaqta Azatlıq radiosı tıñlawçılarına menä närsälär söyläde:

Älege kurslar bötenläy tatar telen belmägän keşelärgä dip isäplängän. Şuña kürä, 120 säğät däwamında uqıtuçılar töp iğtibarnı berençe çiratta söyläm üsterügä, üzara aralaşuğa birälär. Kurslarda tıñlawçılar latin yazuın da üzläşterälär. Şunısı qızıq, uquçılarnıñ kübese rus millätennän bulsa da, alar latin imlasın bik ciñel üzläşterälär. Bu tatar telen öyrätü kurslarınıñ üzençälege şunda, monda olı keşelär uqıy. Mäktäptä yäisä balalar baqçalarında tatar telen uqıtu inde cayğa salınğan bulsa, respublikada olı keşelärgä tel öyrätü täcribäse älegä bik az. Läkin bu eş bik qatlawlı bulsa da, keşelärdä xäzer tatar telen öyränergä kiräklegen tanu bar. Şuña kürä bez kiläçäktä dä älege eşne däwam itäçäkbez.

Şuşı könnärdä genä Tatarstan xökümäteneñ Tellärne üsterü bülegendä tatar telen öyrätü kursların oyıştıru buyınça kiñäşmä uzdı. Bülekneñ citäkçese Kim Miñnullin alıp barğan bu cıyılışta süz kurslarnı oyıştıruda, uzdıruda kilep tuğan qıyınlıqlar, alarnı çişü yulları turında bardı. Töp qıyınlıqlar bulıp uqıtuda metodik äsbaplarnıñ citmäwe, uqıtu metodikalarınıñ yasalıp betmäwe tora ikän. Läkin bu problemalarnı çişü östendä eş inde bara. Kiläçäktä uzaçaq kurslarğa kilgändä isä, Färit Gäräev süzlärenä qarağanda, alarda eş qäğäzlären tatar telendä alıp baru mäs’äläse dä qaralaçaq. Şulay uq, telne öyränüne däwam itü kursları da oyıştırılaçaq. Bu tatar telen öyränüçe uquçılarnıñ täqdime buyınça eşlänä. Şulay itep, Tatarstannıñ Konstitutsiäse, Respublika xalıqları telläre turındağı qanun nigezendä respublika xökümäte barlıq telägän ministrlıqlar xezmätkärlärenä tatar telen öyränergä mömkinçelek tudıra.

Gölnaz İlgizär

XS
SM
MD
LG