Accessibility links

якшәмбе, 11 декабрь 2016, Казан вакыты 09:06

Ul'yan ölkäse İske Qulatqı rayonında Bötendönya Tatar kongressınıñ küçmä utırışı buldı...


Çarada, BTK citäkçelärennän tış, Ul'yan ölkäse Milli-mädäni moxtariatı prezidiumı äğzaları, Moxtariatnıñ rayonnar büläkçäläre räisläre, milli oyışmalar wäkilläre qatnaştı. Alar başta Urta Tereşqa häm Yaña Zimniçä awıl mäktäpläre häm rayon üzägeneñ 2nçe mäktäbe belän tanıştılar. Räsmi utırışta ölkä xaqimiäte wäkilläre dä qatnaştı: ölkä başlığı urınbasarı Valeri Kuroçqa, Mädäniät häm Mäğärif idaräläre başlıqları Nelli Fadeyeva häm Vladimir Mironov.

Utırışnıñ kön tärtibe “Mädäniät, mäğärif, eşmäkärlek ölkäsendä xalıq traditsiälären torğızu eşçänlegendä milli-mädäni berläşmälärneñ xaqimiät belän xezmättäşlege” dip atalsa da, küpçelek çığışlar üz eşçänlekläre turında bäyän itü bulıp çıqtı. Şulay da xaqimiät belän mönäsäbätlärgä qağılışlı süzlär dä yañğıradı. Ul'yan ölkäse Milli-mädäni moxtariatı räise Azat Kurçakov, mäsälän, moxtariatnıñ eşçänlege häm çişelmägän problemalar turında söyläde. Problemalar bar, kübese türälärneñ añlamawları arqasında. Şuña da karamastan, avtonomiä räise citäkçelek belän mönäsäbätlär turında qanäğätlek belderde. Häm ul ğına tügel, qayber başqa çığışlar da şulayraq yañğıradı. Şuñadır inde, Federal' avtonomiä räise Rimzil Wäliev üz çığışın menä niçek başladı: “Bik matur söyläşep utırğanda milli xäräkät belän citäkçelek arasındağı mönäsäbätlär turında süz yörtü ritual ğamäl genä dip uylarğa mömkin. Läkin eş alay tormıy – problemalar bixisap.” Häm ul üz çığışın näq kön tärtibenä quyılğan tema problemalarına bağışladı. Problemalarnı çişü öçen mäs’äläne qabırğası belän quya belergä kiräk, dide ul. 2002nçe yılğı Kongress waqıtında milli xäräkät liderlarınıñ İlbaşı Putin belän oçraşıp söyläşüen Rimzil Wäliev zur uñış dip atadı. Putinnıñ 4 yöklämäsen ütäw östendä tieşle tarmaqlar eş alıp bara, Rusiäneñ milli säyäsäte konsepsiäsen üzgärtü östendä eşlilär alar. Ministr Zorinğa kilgän täqdimnär arasında Orenburg, Perm ölkälärenekendä aqıllı fikerlär buluın äytep ütte. Mäsälän, Mäskäw, töbäklär häm munitsipal' berämlekläre arasında wazifalarnı anıq bülü kiräklege, milli mänfäğätlärne qanäğätländerü öçen, Konstitutsiäne, Tellär häm Mäğärif turındağı qanunnarnı tögäl ütäw dä citä, kebek fikerlär Tatarstan täqdimnäre belän awazdaş. Ä Tatarstan täqdimnäre ğomum däwlätebez faydasına xezmät itälär, çönki alar Rusiä Federatsiäsen saqlaw häm nığıtuğa yunältelgän.

Rimzil Wäliev şulay uq Ul'yan ölkä avtonolmiäse räise Azat Qurçaqovnıñ Federal' avtonomiäne Mäskäwgä küçerü kiräklege turındağı täqdimeneñ nigezsezlegen añlattı. Şunısı iğtibarğa layık, Rimzil Wälievneñ çığışı Ölkä başlığınıñ urınbasarı Kuroçqa süzläre belän awazdaş: ul da, Rimzil kebek ük, anıq milli säyäsät buldıru mäs’äläseneñ ölgergänlegen äytte. Häm yaña süz: xaqimiät türäse ana telendä uqu mömkinlegen dä keşe xoquqları rätendä dip sanawın äytte. Ölkä mäğärif idaräse başlığı Vladimir Mironovnıñ çığışında da küñelle süz işetelde: Weşqayma rayonı ürnägendä, qatnaş xalıqlı rayon üzäkläre mäktäplärendä tatar telen uqıta başlaw turında kiräklegen äytte ul. Läkin anıñ ölkä üzägendä ayırım tatar mäktäbe açu öçen bina yuk, digän süzläre kisken sorawğa säbäp buldı. “Prezident Putin Latviädäge rus telle balalarğa rusça belem aluda yärdäm wäğdä itte, ä Rusiä balalarına ana telendä belem alu öçen bina yuk. Mondıy xälne äxlaqi häm yuridik yaqtan niçek bäyäläp bula?” Mäğärif türäse üz süzen mäktäp binalalarınıñ şähär meriäse milke buluı belän añlattı, häm monda äxlaq turında süz yörtüneñ urınsız ikänen äytte.

Utırışnıñ soñında BTKnıñ Başqarma komitetı räise urınbasarı professor Damir İsxaqov iğlan belän çıqtı. Ul 2002-2007nçe yıllarda tatar xalqınıñ üseşe programması Konsepsiäsen buldıru öçen Fänni-ekspert şurası tözelüen belderde. Anda qatnaşırğa Ul'yan wäkillären dä öndäde. Qazan qunaqları bu yulı da buş qul belän kilmägännär ikän. Utırışnıñ axırında Rinat Zakirov Qulatqı mäktäpläre öçen 12 komp'yutor häm 5 iärçen antennaları büläk itülären belderde.

XS
SM
MD
LG