Accessibility links

җомга, 9 декабрь 2016, Казан вакыты 10:53

“Qazan” biü ansamble Sember tatarlarına moña qädär tiñe bulmağan tamaşa büläk itte...


Semberneñ iñ zur zalı – Lenin memorial' üzägendä “Qazan” biü ansamble moña qädär tiñe bulmağan tamaşa büläk itte. Ozın-ozaq alqışlar şunı kürsätte.

Närsäse belän oşağan soñ bu konsert tamaşaçığa? Küplär kiemnäreneñ güzällege, biüçelärneñ ostalığı, xoreografiäneñ tirän eçtälekle buluına qänäğät. Boları küzgä bärelep tora. Läkin tamaşaçılar arasında tiränräk fiker yörtüçelär dä baytaq. Menä berniçä küzätü.

Moña qadär urısnıqı dip sanalğan biyu elementların xalqıbızğa qaytaru.

Rusiädä, nigäder, tatarnıñ milli baş kieme bulıp tübätäy genä sanala ide. Ä tiredän tegelgän kiemnär başqortqa ğına “birelgän”. Borınğı babalarıbıznıñ mäşhür sunarçılar bulğanın iskä alu da bulmadı. Nihayät, “Qazan” ansamble bolğar babalarıbıznıñ kiemnären üzebezgä qaytardı. Şuña kürä “Borınğı tatar suğışçıları biüe” tamaşanıñ yözek qaşıday qabul itelde.

Konsertnıñ tağın ber uñay yağı – xalıq cırlarına iğtibarnıñ kübräk buluı. Cırçılarıbız qayçaqta “Menä bu borınğı cır zalda utırğan ölkän yäştägelär öçen”, dilär. Yäşlärgä tıñlarğa da yaramıy, diärseñ. Älege konsert bu süzneñ bötenläy nigezsezlegen isbatladı. Tamaşaçınıñ “Olı yulnıñ tuzanı” cırın niçek alqışlağanın kürgän keşe mondıy süz äytä almas. Eş şunda ki: zalda küpçelek - yäşlär ide. Säbäbe – kürenekle maltabar Alsu Balakişievanıñ taliplar öçen 400 bilet üz xisabına satıp alıp taratuı.

Tamaşanıñ yaxşı yaqları turında küp söylärgä bulır ide. Läkin tamaşaçı teläklär dä belderde. Konsertnıñ ikençe öleşe tulayım diärlek dönya xalıqları biülärenä birelgän. Başqa xalıqlarğa ixtiram, älbättä, yaxşı sıyfat. Läkin ixtiram ike yaqlı bulırğa tieş iç. Tatarnıñ milli biülären nindi xalıq üz repertuarına kertkäne bar, mäsälän?

“Qazan” ansamleneñ mondıy repertuarı başqa xalıqlar öçen birelgän tamaşalarda bik qulay bulsa da, üz xalqıñ aldında çığış yasağanda üz sänğäteñ belän ğorurlanu xise tärbiäläw dä möhim närsä bit äle. Yal itep soqlanıp utıru ğına tügel...

Ayrat İbrahim, Sember.

XS
SM
MD
LG