Accessibility links

шимбә, 3 декабрь 2016, Казан вакыты 10:01

Xikmätle xällär.


Böten Rusiädä kiläse yal könnärendä awıl xucalığı bäyrämen ütkärälär. Tatarstanda bıyıl ikmäk kükräp üste, çögender-bäräñge dä yaxşı uñış birde, eş bik qızu, şunlıqtan bäyräm ber ayğa kiçekterelä. Bu yulı federal' üzäk mondıy nayanlıqqa küz yoma.

Tatarstanıñ däwlät oyışmalarınıñ sanı 1460 citkän ikän. Başqortostanda alarnıñ sanı 3-4 tapqırğa kimräk di. Tatarstanda yustitsiä buyınça 2 ministrlıq: berse federal' üzäkneke, berse respublikanıqı, ekologiä buyınça da ike qatlı ministrlıq.

Xäzer Tatarstanda federal' häm töbäk idärä orğannarınıñ xezmätkärläre 23% qısqarılırğa tieş. Premyer-ministr Röstäm Miñnexanov çinovniklarnı qısqartu öçen çaralar kürügä ber yıl waqıt birgän.

Uzğan atnada tatarstannıñ mädäniät ministrı İldus Tarxanov Ufada Türksoy utırışına qatnaşıp qayttı. Anda Başqortostan mädäniät ministrı böten törki xalıqları wäkilläre qarşında başqort xalqınıñ şağire Qol Ğali bar, “Yosıf-Zöläyxä” kitabı belän ğorurlanabız, digän. Tatarstan ministrı İldus Tarxanov bu nayanlıqqa şaqqatqan, ämma Qol Ğalineñ, “Yosıf-Zöläyxä”nıñ ğomumtörki häm berençe çiratta tatar ädäbiäte bilgeläre buluı turında çamalasa da, ber süz dä äytmägän. Qazanğa qaytqaç qına, İldus äfände bezneñ ğalimnär qaya qarıy ikän, dip zarlandı.

Ä ğalimnärneñ tatar milläten saqlawğa häm üsterügä kertkän öleşe turında Damir İsxaqov maxsus komissiä cıyıp, notıq söyläde. Ämma ul yış telgä alğan akademiklar bu cıyılışta bulmadı.

Küñelle xikmätlär dä bula. Bu atnada Qazan universitetında tatar teleneñ qullanu mäğlümati tele bularaq yäşäyeşe turında dissertatsiä yaqlandı. Tovarlardağı yazular, alarnıñ isemnäre, qullanu alımnarı turında bik möhim fikerlärne qullanuçılar üzäge xezmätkäre Älfinur xanım Latıypova tuplağan ikän. Dimäk, kibetkä barğaç, tovar saylasağız, anıñ tatarça yazılışına iğtibar itä alasız, milli reklamağa da küz salığız. Xäzer bu eş fänni yaqtan nigezlängän, praktikanı kiñräk taratası ğına qaldı.

Ni qızğanıç, Aqtanış rayon xakimiäte, Başqortostannıñ Ağidel şähärendä yäşägän tözüçelärne yallap hönär mäktäben remontlatsa da, haman eş öçen kürşe respublikadağı millättäşlärebezgä berniçä yöz meñ sumnı tülämi ikän. Äytergä kiräk, mäğärif ministrlığınıñ küptän tügel bulğan kollegiäsendä Aqtanış xakimiät başlığı Engel' Fattaxov xalıq mäğärife ölkäsendäge uñışlar turında täcribä urtaqlaşqan. Çınnan da, aqtanışlılar mäğäriftä alda. Administratsiä başlığı uñğan, tik menä kürşe respublikadağı tatarlarnı aldap yörtü kileşmi.

Qazannıñ Mädinä mäçete ixatasında tawıqlar, ätäçlär tibenep yöri ikän. Yuq, mäçet xezmätkärläre tawıq simertep tamaq tuydırır öçen asramıy alarnı. Mäçetneñ imamı äytüençä, irtä tañnan ätäç qıçqırıp, mullanı azan äytergä çaqıra ikän. İkençe ätäç qıçqırğanda, namazğa kereşälär, öçençesendä namaz uqu tämamlana ikän. Menä şuña kürä Mädinä mäçeteneñ imam xatibı «Yaña ğasır» telekanalı aşa bu ğämälne Ätäç qıçqıru xikmäte dip atadı. Çınnan da, ğibrätle xäl bu. Xäzergä şular.

Rimzil Wäli

XS
SM
MD
LG