Accessibility links

Кайнар хәбәр

Zinnur Nurmöxämmätov mäñgelek yortqa küçte…


8nçe oktäber könne populyar cırçı Tatarstannıñ xalıq artistı, Zinnur Nurmöxämmätov wafat buldı. Zinnur Nurmöxämmätov 1941nçe yılnıñ 11nçe dekaberendä Ästerxan şähärendä tua. 1968nçe yılda Qazanğa gastrol'lärgä kilep, tamaşaçı mäxäbbäten yawlıy. 1969nçı yıldan G.Tuqay isemendäge Tatar däwlät filarmoniäsendä eşli başlıy. Şul uq yıllarda Rimma İbrahimovalar belän bergä Mäskäw estradası studiäsendä belem ala. Zinnur Nürmöxämmätov 1969-1992nçe yıllarda Tatar däwlät filarmoniäsendä solist bulıp eşli. Häm ğömeren cırğa, säxnägä bağışlıy. Anıñ İ.Şakirov häm G.Afzal icat itkän “Gölmäryäme”, R.Xäsänovnıñ “Äqlimä”se, S.Sadıyqova häm S.Xäkimneñ “Ütkän yıllar–minem baylığım”, R.Yäxin belän Ä. Yerikäy icat itkän “Cırlanmağan äle bezneñ cır” cırları här tatar ğailäsenä tanış.

Comğa könne 10nçı oktäberdä Tatarstan filarmoniäseneñ konsertlar zalında märxüm belän xuşlaşu yolası buldı. Anı Tatarstan mädäniät ministrı İldus Tarxanov alıp bardı. Xuşlaşırğa kilgän millättäşlär arasında Ästerxan tatarlarınnan Naciä Terkulova, Nailä häm Zöfär Safinnar da kilgän ide. Xuşlaşu süzlären äytkän millättäşlär arasında anıñ turında söyläwçelär “Estradağa yañalıq kertüçe, tınğısız can, cır, säxnä söyçe. Üzeneñ tırışlığı, köçe, därtlelege belän härçaq ürnäk buldı. Xalqıbız küñellärendä ul berqayçanda onıtılmas.”,- didelär. ”İcadi şäxeslär, bigräk tä cırçılar, säxnädän başqa yäşi almıy. Alar bigräk tä xalıqtan ayırılunı kütärmi.”- didelär Zinnur Nurmöxämmätovnı ozatırğa kilüçelär.

Sanduğaçnı pensiägä aşıqtırıp ozatu, yış qına üzen aqlamıy. Tatar xalqınıñ bik matur mäqäle bar.“İsännärneñ qäderen bel, ülgännärneñ qäberen bel”.

451 yıl elek Qazan xanlığınıñ yawlap alınuı xalqıbıznıñ xäterendä. Bıyılğı xäter köne tatar ictimaği oyışmaları tarafınnan 12nçe oktäberdä uzdırıla. Ä 9nçı oktäberneñ pänceşämbe kiçendä Qazan milli–mädäni üzägendä ädäbi-muzıykal' kiçä buldı. Anda bik küp sänğät eşlekleläre qatnaştı. Qamal teatrı artistları Äzhär Şakirov, Rinat Tacetdinov, Qazan biü ansamble artistları. Cırçılar Ferdinant Säläxov, Zöhrä Säxäbieva, şağirlär Lena Şağircan, Mödärris Äğlämovlarnıñ mäğnäle şiğerlären tä'sirle itep uquları, kiçägä cıyılğan xalıqnı, däwläte yuğalğan millätebez yazmışınıñ kiläçäge turında uylanırğa, tirän xislär kiçerergä mäcbür itte.

10nçı oktäberdä comğa könne Qazan tatar yäş tamaşaçı teatrı üzeneñ bik küptän kötelgän premyerasın kürsätä. Rabit Batulla p'yesasın teatrnıñ baş rejisserı Rinat Äyupov säxnäläşterde. Spektakl' öçen muzıkanı xäzer Amerikanıñ Sietl şähärendä yäşäwçe Mäshüdä Şämsetdinova yazğan.

Mälikä Basıyr

XS
SM
MD
LG