Accessibility links

Кайнар хәбәр

"Äl-Qaidä" bar dönya buylap terror ğämälläre oyıştırudan waz kiçmi dip belderä amerikan wäkile


Bagdadta häm Ğiraqnıñ başqa şähärlärendä şartlawlarnı kemnär oyıştıra digän soraw küplärne borçıy. Waqıtlı idarä şurası wäkilläre, Ğiraqtağı terror artında çit illärdän kilgän keşelär tora dip belderä häm bu uñaydan mäğlüm "äl-Qaidä"gä işarä itä. Amerikan yağı birgän soñğı mäğlümatqa qarağanda, şuşı törkem çınnan da yaña höcümnär planlaştırğan bulğan.

"Äl-Qaidä" törkemeneñ bar dönya buylap yaña höcümnär planlaştıruwı xaqında "Associated Press" agentlığına Quşma Ştatlarnıñ eçke iminlek ministrlığında eşläwçe yuğarı däräcäle wäkile, William Parrish belderde. Yaqınça ber ay elek amerikan yağı iminlekkä yanaw turında maxsus kisätü bäyän itkän ide, anıñ näq menä "äl-Qaidä"däge qayber keşelär äzerlägän ğämällärne waqıtında faş itü näticäsendä yasaluwı açıqlandı. Şul çaqta alarnıñ qayberäwläre qulğa alınğan, häm Parrish süzlärenä qarağanda, soñraq alar amerikannarğa şaqtıy möhim mäğlümat birgän. Şunnan kürengänçä, "äl-Qaidä" çınnan da Amerika Quşma Ştatlarında yaña höcümnär äzerlägän bulğan. Parrish, alar berniçä urında berük waqıtta yasalırğa tieş bulğan dip belderä. Şuşı amerikan wäkile ildäge eçke iminlek ministrınıñ mäğlümatne eşkärtü ölkäsendäge yardämçese bulıp eşli, anıñ süzlärençä, älegä tuplanğan bar mäğlümat şunı kürsätä - terrorğa qarşı alıp barılğan dönyaküläm suğışqa qaramastan, "äl-Qaidä"dän yanağan qurqınıç Quşma Ştatlar öçen iñ citdilärennän berse bulıp qala birä. Parrish qulı astında bügenge köndä 60-lap xezmätkär eşli, alarnıñ töp wazifası - terror qurqınıçı yanağan bar törkemnär turında mäğlümat cıyu, anı eşkärtü häm şulardan çığıp terrorçılarnıñ kiläçäk plannarın aldan belep toru. Näq şundıy uq eş belän ildä äle ğädäti qüwät ministrlıqları, Üzäk Küzläw İdaräse CİA häm Federal'' tikşerenülär idaräse FBİ-da şöğellänä. Şul oyışmalar arasında mäğlümat belän üzara urtaqlaşu üzäge bar. "Associated Press" belän äñgämäsennän kürengänçä, Parrish citäklägän törkem "äl-Qaidä" eşçänlegen şaqtıy centekläp öyränergä tırışa. Äytik, terrorçılar ilneñ iqtisadı, transport bäyläneşläre öçen ütä dä möhim küperlärne şartlatu maqsatın quydı di. Eçke iminlek ministrlığındağı mäğlümat eşkärtü törkeme, bin Ladennıñ suğışçılar äzerläw cäyläwlärendä küper maketları qullanılamı, küperlärneñ mexanikası öyräneläme, anda monı fänni yaqtan belgän belgeçlär barmı, menä şul närsälärne öyränä. Ara-tirä amerikannar qulına eläkkän "äl-Qaidä" suğışçılarınnan soraw alğanda, berençe qaraşqa ähämiatle bulmağan, iğtibar cälep itmägän mäğlümat ta soñraq zur açışqa, terror plannarın aldan faş itügä kiterä ala. Mäğlümat tuplaw eşendä Parrishnıñ törkeme tamojnä häm immigratsiä xezmäte keşeläre belän dä tığız xezmättäşlek itä. Maqsat - Amerika Quşma Ştatları iminlegenä yanağan ixtimal qurqınıçlar turında ber genä keçkenä xäbärne dä iğtibarsız qaldırmasqa, anı terrorçılar qullanğan strategiä häm taktikağa bäyläp qararğa. Älegä qädär, yäğni 2001-neñ 11-nçe sintäbrennän soñ "äl-Qaidä" Quşma Ştatlarnıñ üzendä başqa höcümnär oyıştırmadı. Eçke iminlek ministrlığında eşlägän William Parrish üze dä moña bik ğäcäplänüwen belderä häm "äl-Qaidä" üz taktikasın üzgärtä ala dip uylıy. Sintäbrneñ 4-endä bäyän itelgän kisätüdä, terrorçılar yänä oçqıçlarnı urlap alarnı qoral itep qullana ala digän faraz äytelgän ide.

Kärim Kamal, Praga
XS
SM
MD
LG