Accessibility links

дүшәмбе, 5 декабрь 2016, Казан вакыты 15:36

Ğiraqta yulğa quyılğan bomba şartlawdan 3 keşe yaralanğan, Tikritta ber amerikan xärbie üterelgän


Ğiraq politsiäse äytüençä, bomba Diyala wilayäte başlığın üterü öçen quyılğan bulğan. Ämma ul isän qalğan. Uzğan ber täwlek eçendä tönyaqtağı Tikrit şähärendä koalitsiä köçlärenä qarşı höcümnärdä qatnaşuda şiklänelgän 34 keşe totqarlanğan. Bu yılnıñ 1 mayında AQŞ Prezidentı George Bush Ğiraqta qatı bäreleşlärneñ tämamlanuın iğlan itkännän soñ barlığı 92 amerikan soldatı üterelde. Kiçä kiç Ğiraqnıñ tönyağında maşinada barğanda cirgä quyılğan minağa yulığıp hälak buldı. Bügen Tikritta tağın ber soldat granataatqıçtan ut açu näticäsendä ülde.

Ankara belän Waşington arasında Ğiraqqa Törkiä ğäskärlären kertü turında söyläşülär däwam itä. Uzğan atnada Törkiä parlamentı Ğiraqqa ber yılğa ğäskärlär cibärüne xupladı. Bügen Ankarada Törkiä Armiäseneñ Baş Ştabı äğzası general Metin Yavuz Yalcin älegä küpme ğäskär cibärü turında qarar qabul itelmägän dide:

AUDİO: Andağı wäzğiätne öyränü öçen törkem cibäreläçäk. Häm tuplanğan mäğlümät nigezendä nindi köçlär cibäreläçäge bilgelänäçäk. Şuña kürä matbuğattağı bez 30 meñ yäki 3 meñ ğäskär cibärergä cıyınabız digän xäbärlär döres tügel. Küpme ğäskär cibäreläçägen tögäl äytergä äle haman da bik irtä.

Ğiraqnıñ İdarä Şurası Törkiä ğäskärlären cibärü totrıqsızlıqnı arttıraçaq qına dip borçılu belderde.

XS
SM
MD
LG