Accessibility links

Кайнар хәбәр

Saylaw isemleklärendä sul qaraşlı firqälär östenlek itä


Saylaw aldı köräşe äle küzgä kürenmäsä dä, yäşerten xäräkätlär inde sizelä başladı. Nämzätlärne kürsätü tämamlandı, ämma saylaw aldı dokumentlarına haman da yaña isemnär östälä bara. Äytkänebezçä xäzer nämzätlärneñ sanı 80gä yaqınlaşa. Saylawçılar sanına qarağanda İdel buyı okrugı iñ zurı bulıp çığa, anda 575 meñnän artıq keşe yäşi. Häm şuşı keşelärneñ küñelen 22 nämzät yawlarğa teli. İñ keçkenäse – Älmät saylaw okrugı. Anda 508 meñ saylawçı isäplänä.

İdel buyı saylaw okrugına Qazanda yäşäwçe saylawçılar kersä, Mäskäw saylaw okrugınnan çıqqan nämzätlärgä Qazannıñ 3 rayonı häm Apas, Buya, Yuğarı Oslan, Täteş rayon xalqına da wäğdälär birergä turı kiläçäk. Qalğan 3 okruglarda tawış birüdä şähär dä, awıl xalqı da qatnaşaçaq. Saylaw aldı kampaniäsen qayda ütkärergä caylıraq? Awıldamı? Ällä şähärdäme? Älegä äytep bulmıy.



Tatarstandağı saylawlarnıñ säyäsi spektrına qarasaq, şunı küräbez. Saylaw byuletennärendä sul qaraşlı firqälär östenlek itä. Sulçılar sızığında kommunistlar firqäse genä tügel, Saci Umalatova citäkçelegendäge «Tınıçlıq häm berdämlek» firqäse dä kürenä. «Xalıq partiäse»n dä şulçılarğa kertergä bula, ul firqä ğadi keşelär xakimiäten urnaştıru häm sotsial ğädellek şiğärläre belän çığa.

Xalıq-milli-patriotik köçlärne dä berniçä firqä wäkilçelek itä. Mäsälän «Rodina» (Watan ) digän xalıq-patriotik berlege dä sotsial ğädellek idealların alğa sörä. «Milli-patriotik köçlär» firqäseneñ täğlimäte kommunistlarnıqına yaqın, läkin bu partiä wäkilläre Rusiädä yäşäwçe millätlärne qolaç cäyep qarşı alırğa tora.



Uñ yaqta «Uñ köçlär berlege», «Yabloko» , «Eşmäkärlekne üsterü» häm başqa firqälär kürenep tora. Saylawçılar iğtibarına «demokratik» töşençäse kergän ber niçä säyäsi berläşmä täqdim itelä. Liberal-demokratik, konstitutsion-demokratik, Rusiäneñ demokratik firqäse.

Urtada toruçılardan «Berdäm Rusiä» häm «Tormış» firqälären atap bula.

Törle sotsial qatlam, törle hönär iälären berläşterüçe firqälär dä bar. Mäsälän, «pensionerlar firqäse», «maşina yaratuçılar berlege», «Yäşellär» digän tabiğätne saqlaw firqäse.

«Berdämläşü kontseptual firqäse» dä şulay uq başqalarğa oxşamadan. Anıñ yulbaşçıları dönyadağı tärtipne cämğiät iminlege kontsepsiäsenä nigezlänep urnaştırırğa teli.

Säyäsi firqälärneñ nigezlämälärendä millätlär, Rusiädä yäşäwçe xalıqlar turında ayırım fikerlär oçrasa da, milli mänfäğätlärne yaqlaw mäs’äläse berseneñ dä saylaw aldı şiğärendä yuq.

Bikä Timerova.

XS
SM
MD
LG