Accessibility links

якшәмбе, 4 декабрь 2016, Казан вакыты 13:24

İminlek Şurası Äfğanstandağı İSAF köçläre wäkaläten bar ilgä cäyelderüne xupladı


Berläşkän Millätlärneñ İminlek Şurası, Äfğanstandağı İminlek urnaştıruğa yardäm itüçe xalıqara köçlärneñ wäkaläten başqala Qabul belän genä çiklämiçä, bar ilgä cäyelderüne röxsät itkän mandatnı xupladı. Şura äğzaları monı bertawıştan qabul itte. Kiläse yılğa bilgelängän ğomumi saylawlar aldınnan ildäge wäzğiatne caylaw häm cirle xärbi başlıqlarğa qarşı çaralar kürü öçen bu xälitkeç adım bulıp tora.

İminlek Şurasınıñ älege qararın Äfğanstannıñ üzendä inde küptännän zur tüzemsezlek belän kötälär ide, xörmätle tıñlawçılar. Älegä qädär ildäge İSAF, yäğni iminlek urnaştıruğa yardäm itüçe xalıqara köçlär başqala Qabul häm anıñ tirälärendä genä tora ide, alarnıñ wäkaläte Äfğanstannıñ başqa töbäklärenä cäyelmäde. Şuña kürä başqaladan qala bar wilayätlärdä dä küpsanlı cirle xärbi başlıqlar xuca itte. Bü äle haman da däwam itä, läkin Berläşkän Millätlärneñ İminlek Şurası qabul itkän soñğı qarar moña kiläçäktä çik quya ala. Ul Şurada bertawıştan, yäğni andağı bar 15 äğzanıñ da yaqlawı belän ütte. Utırışta räislek irkän amerikan wäkile John Negraponte:

Audio, John Negraponte

"Qarar ölgese 15 yaqlaw tawışın qazandı, ul bertawıştan 2003-nçe yılnıñ 1510-nçe qararı bularaq qabul itelde" di İminlek Şurasında xäzerge waqıtta räislek itkän Quşma Ştatlar wäkile Negraponte. Başta amerikan, ä annarı britan, german häm törek xärbiläre qulı astında bulğan İSAF köçläre august ayında NATO citäkçelegenä küçte, bügenge köndä anda barlığı 5 meñ yarım ğäskäri bar. Şularnıñ zur öleşe Germaniä häm Kanadadan kilä. Alar, "Taliban" häm "äl-Qaidä" qaldıqlarına qarşı suğış alıp barğan häm amerikannar citäklägän 11 meñlek ayırım xärbi kontingentqa kermi, fäqät üzläre urnaşqan töbäktä iminlek urnaştıruğa ğına yardäm itä. İSAF mandatın xäzer Äfğanstannıñ başqa töbäklärenä dä cäyelderü, andağı waq-töyäk xärbi citäkçelärneñ xakimiaten çikläwne, häm Qabuldağı üzäk xökümätneñ xakimiaten kiresençä nığıtunı maqsat itep quya. İminlek Şurasında bu xaqta maxsus qarar qabul itü täqdime belän çıqqan Germaniäneñ daimi wäkile Guenter Pleuger.

Audio, Guenter Pleuger

"Äfğanstandağı İSAF mandatın kiñäytü turında german wäkillege täqdimeneñ şulay bertawıştan qabul itelüwenä bez bik şatbız, bu bezgä Äfğanstandağı iminlek wäzğiaten yaxşıraq qayğırtu mömkinlegen birä. Bigräk tä Bonnda başlanğan täräqqiatne däwam itep, kiläse yılda ütäçäk saylawlarnı iskä alğanda" di Germaniäneñ İminlek Şurasındağı daimi wäkile Pleuger. German wäkileneñ süzlärenä qarağanda, Berlindäge xökümät xäzer Äfğanstan tönyağındağı Qondız ğähärenä 450-läp german ğäskärien cibärü öçen bundestagtan maxsus fatixa alu xästären kürä. Älegä qädär İSAF köçlärendä qatnaşqan başqa ber il dä üz xärbilären Qabuldan çitkä urnaştıru telägen beldermäde. Belgeçlär, İSAF bülekçälären berençe çiratta tönyaqtağı Mazari-Şärif häm könbatıştağı Hirat şähärlärenä urnaştıru urınlı bulır ide dip beldersä dä, monıñ öçen östämä ğäskärilärne äle başta tabarğa kiräk bulaçaq. Mazari-Şäriftä 70-läp britan xärbie inde bar, läkin alar İSAF saflarına kermi, ä amerikannar citäklägän terrorğa qarşı köçlärneñ ber öleşe bulıp tora. İSAFnı bar Äfğanstan buylap cäyelderü näq menä şul köçlärnıñ nığıtmaları nigezendä alıp barıla ala.

Kärim Kamal, Praga
XS
SM
MD
LG