Accessibility links

шимбә, 3 декабрь 2016, Казан вакыты 22:45

Bala belän ana mönäsäbäte - mäñgelek mäs''älä


Äytep ütüebezçä, comğa könne Qazan däwlät tatar yäş tamaşaçılar teatrında “Saq-soq” spektakleneñ premyerası uzdı. Şuşı könnän başlap Yäş tamaşaçılar teatrı spektakl'lärne üz binasında kürsätäçäk. Qazannıñ Kirov uramında urnaşqan Gladilova uramında 102 yıl elek tözelgän, aq paraxuttay, matur binada, bügenge köndä yañadan mädäniät uçağı qabındı. 15 yıl elek oyışqan teatr kollektivı, bıyıl üz säxnäsenä ayaq bastı.

Yäş tamaşaçılar teatrınıñ “Saq-soq”spektakle belän sezon açuı da oçraqlı xäl tügel. Çönki ğailädä bala belän ata-ananıñ mönäsäbäte bik möhim, ul mäñgelek mäs'älä. Borın zamannardan uq bügenge köngä qädär kilep citkän “Saq-Soq” bäyete moña dälilder . Cämğiättä, ğäilädä, bala tärbiäläw, ul härwaqıt könüzäk mäs'älä bulıp tora.

“Saq-soq” spektakle bu mäs'älädä mädäni çara aşa, tärbiäwi rolen başqara.Äsär balalarnı ata-ananı tıñlarğa çaqırsa, ata-anağa balalarına bäddoğa qılmasqa, balaların qarğamasqa öndi.

“Saq-soq” spektakleneñ törle variantları buluğa qaramastan anıñ syujetı timer uqnı büleşä almağan balalarnıñ ızğışuın xuplamağan ana, balaların qarği, häm üze ük şuşı qarğışqa yulığa. Çönki qarğalğan balalar qoşqa äylänep tönneñ buyına quşılırğa ber-bersenä tartılalar, inde quşıldıq qına digändä tañ ata başlaw belän ber-bersen tağın yuğaltalar. Häm äniläre üze dä balaların başqa kürä almıy ğazaplana. Şulay itep, balaların qarğağan ana da, ananı tıñlamağan bala da, üzlären mäñgelek ğazapqa salalar. Häm moña berkem yärdäm itä almıy, xätta täñre dä.

“Saq-soq” bäyeteneñ Rabit Batulla pyesası buyınça äzerlängän variantnı Rinat Äyupov säxnäläştergän. İslam dinenä xätle bulğan mäcüsilek zamanın xäterlätkän “Saq-soq” spektaklendä Mäsxüdä Şämsetdinovanıñ zamança simfonik muzıkası, Alpamşa belän Albastınıñ köräşüen, balaların yuğaltqan ananıñ ğazabın - büre kebek ulawın, saq soq dip qıçqırıp yörgän qoşqa äwerelgän balalarnıñ yılawın, tamaşaçığa toyarğa yärdäm itä.(Spektakl'dän ber mizgel tıñlıy alasız.)

Säxnäneñ dekoratsiäsendä şulay quyılğan, ber yağı aqtan , ikençe yağı qara tös belän bizälgän. Köç qaysı yaqqa küçä, dekoratsiä dä xäräkätkä kerä başlıy.Artistlarnıñ kiemnäre dä: pozitiv obrazlar - aq töstä, ä yaman obrazlar- qara töstä.

Säxnädä, älbättä, muzıka, tawış, kiem-salım yärdämendä aqnı qaradan ayırırğa ciñel, ä çın tormışta balağa yamannı yaxşıdan ayırırğa bik awır şul.

Azatlıq radiosı öçen Qazannan Mälikä Basıyr.

XS
SM
MD
LG