Accessibility links

якшәмбе, 4 декабрь 2016, Казан вакыты 19:29

Tatarstannıñ Finländiä belän xezmättäşlege tatarlar yärdämendä arta


Dönya buylap cıyılğan tatarlar turında äytkändä, ğädättä çittäge millättäşlär aşa iqtisadi bağlanışlarnı üsterü mäs’äläsen küz aldında totalar. Tatarstannıñ Finländiädä daimi wäkilçelege bulmasa da, andağı tatarlar yärdämendä respublikanıñ Suomi ile belän xezmättäşlege uñışlı alıp bara.

Finländiä wäkilläre soñğı arada atna sayın kilep tora. 14nçe oktäberdä Tatarstan cirenä kilep töşkän qunaqlar Rusiä belän Finländiä arasındağı fänni-texnik xezmättäşlekne bağuçı xökümätara komissiäne wäkilçelek itä. Fin qunaqları arasında Hel’sinki, Tampere universitetları, Fin Fännär Akademiäse ğalimnäre, berniçä bank, säwdä ministrlıqları xezmätkärläre bar. Çärşämbe könne Tatarstannıñ tışqı eşlär ministrlığında, Tatarstan fännär akademiäsendä häm «Aq Bars» kommersiä bankında oçraşular bulaçaq. Xäteregezdä bulsa, äle küptän tügel genä «Mädäni comğa» gäzite ğalim İlbaris Nadirovnıñ Hel’sinki universitetı çaqıruı belän Finländiädä bulıp qaytuı häm tatarlar turında leksiä uquı xaqında külämle yazma bastırıp çığardı. Fin ğalimnäre dä tatarlar tarixın öyränä.

Küptän tügel genä, Qazanda, Finländiä belän säwdä häm iqtisad tarmağındağı xezmättäşlekne bağuçı eşlekle törkemeneñ wäkilläre oçraştı. Anda Suomi ileneñ tışqı xezmättäşlek ministrlığı wäkilläre belän bergä tatar oyışması wäkile Okan Tahir da kilgän ide. Şulay uq ul oçraşuda Finländiä belän urtaq şirkät citäkçese Rinat İslamov da buldı. İke yaqnı energetika, nefteximiä, tözeleş, tabiğätne saqlaw häm başqa ölkälärdäge urtaq proyektlar qızıqsındıra.

Finländiä belän Tatarstan säwdä äyläneşeneñ külämen başqa illär belän çağıştırğanda, Suomi ileneñ 5nçe urında toruı açıqlana. Läkin çitkä kitä torğan häm respublikağa kerä torğan tovarlarnıñ küläme, uzğan yıllarğa qarağanda bıyıl 7% kimegän. Finländiägä kübesençä nefteximiä äyberläre cibärelsä, Tatarstanda ul ildän kübesençä elemtä cihazları kilep tordı.

İqtisadi häm fänni xezmättäşlek belän ber rättän, mädäniät ölkäsendä dä yaqınayu bar. Mäsälän, dramaturg Zölfät Xäkimneñ yaña äsärendä süz rus-fin suğışı turında bara. Äsärdä äytelgänçä, ike yaqta da tatarlar suğışqan ikän. Pyesadağı häm çın tormıştağı xällärneñ barışı äle bilgele tügel. Anı waqıt qına kürsätä ala.

Bikä Timerova

XS
SM
MD
LG