Accessibility links

җомга, 9 декабрь 2016, Казан вакыты 22:28

Xäter köne Semberdä dä bilgeläp ütelde


Qazanda uzğan Xäter könendä Tol'yattidan häm Semberdän dä milli canlı keşelär qatnaştılar. Qazannı berençe märtäbä kürgän Tol'yatti qunaqları märkäzebezneñ maturlığı, paqlığına soqlanıp yördelär. Bigräk tä alarğa Qazannıñ borınğı arxitektura häykälläre oşadı. Häm, älbättä inde, Kreml' belän tanışu onıtılmas tä'sirlär yasadı. Qunaqlar videokamera häm fotoapparat yärdämendä Qazan küreneşläre belän yaqınnarın da tanıştıru mömkinlegenä bik tä qänäğät qaldılar. Läkin alarda uñaysız xislär tudırğan küreneşlär dä oçrağan. Äytik, Qazanğa qarağanda, Tol'yatti uramnarında tatarça söyläşü yışraq oçrıy. Ä muzıqa ikesendä dä ber ük – urısça ğına. Bigräk tä Bauman uramında xozurlanıp yörergä omtılış küñelsez näticä birde. Reklamalarnıñ tatarça oçramawı da awır qabul itelde, didelär qunaqlar.

Ğomumän alğanda, alar säyäxät belän bik tä qänäğät qaldılar. Xäter könendä işetelgän süzlär dä tirän tä'sirle buldılar. Arada iñ yäşe Ramil Minraximevkä “Qazan yegetläre” kämite ayıruça oşadı. Ul cäyen dusları belän tağın Qazanğa yal itärgä kiläçägen belderde.

Semberdä dä Xäter köne uzdı. Anı “Sember ile” isemle milli mäcles häm “Watan” firqase oyıştırdılar. Cıyılğan tatarlar yanına başqa millätlär wäkilläre dä quşıldı: qızıqsındılar. Çaranı oyıştıruçılar alarğa täfsille cawaplar birdelär. Baqsañ, cıyılğan tatarlarnıñ qayber taläpläre ruslarnıñ teläge belän dä awazdaş ikän.

Bu cıyın borınğı Cämiğ mäçet urınında buldı. Şul uq urında Kafedral' Sobor tözü turında küp bäxäslär bulsa da, qarar qılınğan inde. Ölkä başlığı Şamanov bu tözeleşkä 1 million rubl' aqça birergä quşqan. Şul uq waqıtta 2004-yılğa ölkä byudjetın ğinwar ayına qädär qabul itep bulmayaçaq, çönki Mäskäwneñ küpme aqça birüen belmi torıp, byudjet qabul itü waqıtsız, dilär citäkçelär.

Ayrat Ibrahim

XS
SM
MD
LG