Azärbäycan räsmiläre äytüenä qarağanda, Qazan waqıtı belän köndezge säğät ikedä ük saylawçılarnıñ 56 protsentı tawış birgän.
Azärbäycannıñ xakimiättän kitüçe xäzerge prezidentı 80 yäşlek Häydär Aliev sälamätlege naçar bulu säbäple Quşma Ştatlarda xastaxanädä yata.
Bu saylawlarda anıñ ulı, premyer-ministr İlham Aliev ciñep çığar dip kötelä.
Saylawlarda tağın 7 namzät qatnaşa. Ämma şularnıñ barı ikese genä - Musavat Partiäse wäkile İsa Gambar belän Milli Bäysezlek Partiäse wäkile Etibar Mamedov qına İlhamğa çın köndäş dip qarala.
Gambar xakimiätlärne xärämläşergä cıyınuda ğäyepli.
Xalıqara oyışmalar politsiäneñ oppozitsiä cıyınnarında köç qullanuı, qurqıtuları, matbuğatta ğädelsez yaqtırtular turında xäbär itep bu saylawlarnı tänqitläp çıqtı. Musavat partiäseneñ saylawlardağı ber küzätüçese, räsmilär anıñ qayber keşelär berniçä märtäbä tawış birä digän şikayäten kire qaqqannan soñ üz-üzenä ut törtte. Tawış birüneñ berençel näticäläre bügen iğlan itelä başlar dip kötelä.
