Äfğän räsmie äytüençä, ilneñ könyağında 2 kön däwam itkän bäreleşlärdä, AQŞ xärbiläre häm boralaqlar yardämendä, Äfğän soldatları Taliban qaldıqlarınıñ 7 suğışçısın ütergän, 12-sen qulğa alğan.
Politsiä başlığı Haci Möxämmät Axtar, Kandahardan 150 çaqrım tönyaq-könçığışta Çaar-Çeno rayonındağı bu bäreleşlärdä 3 Äfğän soldatı hälak buldı, 5-ese yaralandı dip belderde.
Aktar qulğa alınğannardan soraw alu başlandı dide.
Ul şulay uq, düşämbe könne başlanğan bu operatsiädä 500 äfğän soldatınıñ qatnaşuı turında äytte.
Bügen Germaniä xökümäte Äfğänstanda NATO citäkçelegendä eşläwçe Xalıqara İminlek Yardäme Xezmäte İSAFnı nığıtırğa Kunduz töbägenä östämä 450 xärbi cibärü qararın xupladı.
Äfğänstanğa östämä köçlär cibärü mäs'äläse kiläse atnada Germaniä parlamentında tawışqa quyıla.
Qabuldağı 5500 keşelek İSAF köçläreneñ küpçelegen Germaniä häm Kanada xärbiläre täşkil itä.
