Accessibility links

пәнҗешәмбе, 8 декабрь 2016, Казан вакыты 05:04

Vladimir Putin: Rusiä möselmannarı islam dönyasınıñ ber öleşe


İnde mäğlüm bulğança, İslam illäre konferensiäseneñ Malayziädä açılğan ike könlek oçraşuwında qunaq bularaq Rusiä wäkillege dä qatnaşa. Prezidentı Vladimir Putin üze citäklägän şuşı wäkillektä tatar-başqortlar da bar. Küpçelek xalqın möselmannar täşkil itkän Başqortstannı anda prezident Mortaza Räximov, ä Tatarstannı Däwlät Şurası räise Färit Möxämmätşin wäkillek itä.

Rusiä prezidentı Vladimir Putin Malayziägä bıyıl inde ikençe märtäbä kilä, xörmätle tıñlawçılar. Berençe yulı ul bar dönyanı ğına tügel, xätta üz ilendäge säyäsi elitanı da, Rusiä İslam Konferensiäse oyışmasınıñ eşendä qatnaşa ala digän belderüwe belän ğäcäpländergän ide. Çeçnädä suğış alıp barğan häm xakimiatkä kilüwe Rusiädäge böyekmämläkätçel häm pravoslav käyeflärneñ köçäyüwe belän bilgelängän prezidenttan, möselmannar belän eşläwne genä tügel, ä möselman oyışmasına quşılu ideäsen bötenläy kötmägännär ide. Läkin Putin soñraq, şul süzlären nindider waqıtlı fayda kürü maqsatında tügel, ä citdi äytüwen qabatladı. Möselmannar Rusiädä kilmeşäk tügel, alar anda asaba xalıqlardan. Rusiäneñ islam dönyası belän nığraq bäyläneşlär ezläwe tabiği şulay itep. Häm iñ möhime, ikençe yaqta da, yäğni İslam Konferensiäse oyışmasında da Mäskäwneñ şul teläge zur qızıqsınu uyattı häm menä Vladimir Putin inde yänä Malayziädä. Atnakiç anda barlığı 57 möselman ile kergän İslam Konferensiäse oyışmasınıñ zur cıyını açıldı häm Rusiä şuşı oçraşuğa qunaq bularaq çaqırıldı. Üz ileneñ möselman dönyasına çit bulmawın raslaw öçen Putin Malayziä başqalasına Rusiägä kergän qayber möselman respublikalarınıñ yuğarı citäkçeläre ozatuwında kilde. Alar arasında Başqortstan prezidentı Mortaza Räximov, Tatarstan Däwlät Şurası räise Färit Möxämmätşin, yaña ğına çäçän prezidentı itep saylanğan Äxmät Qadırov bar. Säfär aldınnan Rusiä mäğlümat çaraları, bu wäkillektä Rusiä xökümäte äğzası, däwlät milke ministrı, tatar Färit Ğäzizullin da bulaçaq dip xäbär itkän ide. İslam Konferensiäse oyışmasınıñ şuşı olı mäclesendä tatar wäkilläreneñ dä, ayırım alğanda Färit Möxämmätşinneñ qatnaşuwı xaqında Qazannan Bikä Timerova.

Audio, Bikä Timerova, Färit Möxämmätşin

Tatarstannıñ Däwlät Şurası räise Färit Möxämmätşin äytep kitkänçä, Malayziäneñ yaña başqalası Putraçayada barğan cıyında qotlaw süze belän Rusiä prezidentı Vladimir Putin dä çıqtı. Anda ul yänä Rusiäneñ, üzendä yäşägän möselmannarı arqasında inde küptännän Könçığış belän Könbatış arasında unikal'' rol'' uynawın bilgeläp ütte.

Audio, Vladimir Putin

Şulay itep Rusiä citäkçese, üz ileneñ İslam Konferensiäse oyışması qısalarında eş itüwe ğadel wä imin dönya qorunıñ möhim ber öleşe bulaçağına ışanuwın äytä.

Audio, Vladimir Putin

"Rusiäneñ qatnaşuwı İslam Konferensiäse oyıması eşenä yaña ber tös birü belän genä çiklänmäyäçäk, ä bälki anıñ eşenä yaña mömkinleklär östiäçäk häm aña Rusiäneñ möselman mäxälläse tawışın wä abruyın da kiteräçäk" di prezident Putin. Mäskäw bu oyışmağa tulı xoquqlı äğza bularaq kerä almıy, häm aña küzätuçe statusı ğına birelä ala. Älegä qädär İslam Konferensiäse oyışmasında andıy xoquqqa barı tik 3 kenä il - Thailand, Bosniä häm Üzäk Afrika respublikası ğina iä ide.

Kärim Kamal, Praga
XS
SM
MD
LG