Accessibility links

җомга, 9 декабрь 2016, Казан вакыты 01:09

Tatarstan byudjetçılarına ni citmi dä, hönärçelär berlegenä ni citmi


16nçı oktäber Berläşkän Millätlär oyışması iğlan itkän azıq-tölek köne. Tatarstan gazetalarında da bügen dönyada 800 million keşe aç tora 62 million keşe azıq-tölek qıtlığı kiçerä digän mäqälälär uqırğa bula. Rusiädä Tatarstanda küpme keşe aç toruı turında mäğlümatlar kiterelmi kiterelüen. Tatar xalqınıñ östälennän ikmäge bäräñgese özelmäsä ul ber waqıttа da aç toram dip zarlanmas-mentalitet şundıy Allağa şöker. Ä menä Tatarstan hönärilär berlegeneñ 15nçe oktäberdä ütkärgän qarşılıq aksiäse xaqındağı xäbärne qayber mäğlümat çaraları “Açnıñ açuı yaman yäki bez nigä xäyerçe” digän baş astında birdelär.

Äye Tatarstan hönärilär berlege dä byudjet xezmätkärläreneñ Rusiäneñ ğomumi qarşılıq aksiäsendä qatnaştı. Qazannıñ Üzäk yal parkı qarşındağı mäydanğa berniçä meñ keşe cıyıldı. Qayberläreneñ qullarında qaysı rayon yäki oyışma wäkile ikänen kürsätkän şiğär, qayberlärendä Tatarstan xökümäten xurlağan şiğärlär. Çığış yasawçılar hönärilär berlege häm oyışma berlekläre citäkçelege xökümätne närsägä tänqitlägännären añlattılar. Rusiä xökümäteneñ oktäberdän byudjetçılarnıñ xezmät xaqların 33 protsentqa kütärü qararı Tatarstanda cirenä citkerep ütälmägän. Xökümät respublika byudjetınnan birelä torğan dotatsiälärne qısqartqan. Şuña kürä Tatarstanda byudjetçılarğa yäğni mäğärif, sälämätlek saqlaw, mädäniät xezmätkärlärenä xezmät xaqı ğämäldä 20 protsent çaması ğına arttırılğan. Bu bik az. Çönki älege tarmaqlarda eşläwçelärneñ urtaça xezmät xaqı 2000 sum çaması häm ike yıl xezmät xaqı artmağan. Tatarstan hönärilär berlege byudjetçılarğa xezmät xaqın 20 protsentqa arttıru bu şul ike yılnı kompensatsiälänü genä dip sanıylar. Kiläçäktä respublika byudjetında xezmät xaqların indeksatsiälänüne qarawnı taläp itälär. Şundıy taläplär belän alar 2004nçe yılğa byudjet proyektın tikşerügä bağışlanğan Däwlät Şurası sessiäse aldınnan piketqa çığarğa cıyınalar. Häm şunıñ belän älege çaranı taswirlawnı tämamlarğa da bulır ide. Läkin tıñlawçılarıbız belän Tatarstan hönäriläre berlege ütkärgän çaradan alğan tä'sirlärem belän urtaqlaşırğa buldım. Çönki çığış yasawçı ber citäkçe süzen jurnalistlarnı iskärtüdän başladı. Ul hönärilär berlege ütkärgän mondıy çaralarnı jurnalistlar yış qına berniqädär ironiä belän taswirlıylar, alay eşlämägez dip kisätte. Şulay itep ironiägä urın bar ideme soñ. Tıñlawçılarıbız sezneñ xökemegezgä. Mäydanğa çara başlanırğa 40-50 minut aldanraq kilergä turı kilde. Şuña kürä mäydan tiräsendä mundirlı häm sivil' kiemle militsiä xezmätkärläre işle ikäne açıq kürenä ide. Beraz soñğıraq mäydanğa terälep torğan stadionda ber avtobus timgelle-timgelle uniforma kigän qorallı keşelär törkeme dä kürergä turı kilde. Bu bit iñ yuğarıda raslanğan häm röxsät itelgän çara. Yortına kergän qaraqlarğa şäm yandırıp berär närsä tapmaslarmı dip bulışa başlağan Xuca Näsretdinnı xäterlätmime bu wäzğiät. Çığış yasawçılarnıñ berençese ük bu mäydanğa 5 meñ keşe cıyıldı dip belderde. Çönki bu aldan bilgelängän isemleklär buyınça cıyılğan xalıq alarnı maxsus avtobuslarğa töyäp alıp kildelär. Añlaşıla ki bolar çınlap qänäğätsez xezmätkärlär tügel. Alarnıñ kübese çığış yasawçılarğa artı belän basıp üzläreneñ söyläp tordı. Hönärilär berlege citäkçelege limuzinnarınnan mäydanğa mömkin qädär yaqın kilep tuqtağaç qına töştelär. Şulay bulğaç monda ironiägä nindi üpkä bulırğa mömkin. Añlaşıla bit inde bu hönärilär berlege citäkçelegeneñ xökümätkä xalıq massalarınıñ qänäğätsezlegen demonstratsiäläp säyäsi alqalar cıyu. Xäyer çığış yasawçılarnıñ berse monısın da äytep birde. Byudjetçılarğa xezmät xaqın arttıru bu saylaw aldınnan xalıqnı köyläw öçen ütkärelä torğan çara digän fiker äytte ul. Tik aq et bäläse qara etkä kilep çığa tügelme soñ.

XS
SM
MD
LG