Accessibility links

Кайнар хәбәр

Däwlät Şurasınıñ 19nçı plenar sessiäse byudjet proyektın berençe uqılışta qabul itte


Däwlät Şurasınıñ 19nçı plenar sessiäse caylı ğına, räte-çiratı parlament töşençälärençä äytkändä - reglamentı quşqança başlanıp kitte. Tatarstan hönärilär berlege wäğdä itkän piket ta bulmıy qaldı. Ğäyre räsmi çığanaqlardan belengänçä hönärilär berlege xökümät belän byudjet xezmätkärläreneñ sälämätlegen nığıtuğa östämä 30 million sum aqça bülep birü häm kompensatsiä tüläwlären elekke däräcädä saqlap qalu turında söyläşülär başlağan. Äle bu hönärilär berlege quyğan taläplär ütäläçäk- byudjet xezmätkärläreneñ xezmät xaqları tieşençä 33 protsentqa artaçaq monnan soñ indeksatsiälänäçäk digän süz tügel. Yaqlar prezident qaytqanıñ häm bu mäs'älädä fikeren äytkänen kötälär. Sessiäneñ kön tärtiben raslağanda deputat Ştanin tağın ber tapqır Däwlät Şurasınıñ üz-üzen tarqatuı mäs’äläsen kütärep qaradı. Läkin inde bu qırıqmasa qırıq tapqır çäynälgän mäs'älä berkemne dä dulqınlandırmıy. Xäl itelgän mäs'älä. Deputatlar mart ayına qädär tınıç qına eşläp beterälär. Annarı soñ därte-därmanı bulğannarı tağın saylawlarda qatnaşa. Elekke şöğelenä äylänep qaytırğa mäcbüriläre dä üpkälämäs inşalla. Eşläp betermägän mötdätläre öçen şaqtıy ğına kompensatsiälär tülänäçäk. Töp mäs’äläne-“2004nçe yılğa Tatarstan Respublikası byudjetı turında” qanun proyektın tikşergändä byudjet “yurğanın” tartqalaşu buldı älbättä. Deputatlar borınğılarnıñ “yatıp qalğançı atıp qal” digäneñ iskä alğanday saylawçılarnıñ yöklämälären iskä töşerep tuğan yaqlarına tuğan zavod fabrikalarına törle problemalarnı xäl itü öçen östämä çığımnar kirägen isbatladılar. Läkin byudjet proyektı barlıq komissiälärdä tikşerelgän çığımnar mömkin qädär arttırılğan başqa xod yuq. Qanun proyektınıñ berençe matdäsendä ük-“2004 yılğa Tatarstan Respublikası byudjetı qıtlığınıñ iñ çik külämen 2625962000 sum itep bilgelärgä” dip yazıp quyılğan. Bu byudjet qıtlığı 10 protsent digän süz. Şuña kürä xätta byudjetta ul tarmaqqa uzğan yılğa qarağanda çığımnar arttırılğan Fän, mäğärif, mädäniät häm milli mäs'älälär komissiäse räise Razil' Wäliev üzeneñ çığışında şaqtıy ğına programmalarnıñ qısqartıluı turında söyläde. Şulay çığımnarda tatarlar küpläp yäşägän töbäklärdä Sabantuylar ütkärügä, mädäniätneñ kürenekle şäxeslärenä häykällär quyuğa, kadet mäktäpläre açuğa, östämä belem birügä aqçalar qaralmağan. Süzen däwam itep Razil' äfände bolay dide. Şulay itep yaña konstitutsiädä qaralğan Tatarstannan çittä yäşäwçe tatarlarğa yärdäm turındağı matdäne ütärgä dä aqça yuq. Menä şundıy kierenke byudjet proyektı berençe uqılışta qabul itelde. Başqa mäs’älälärne qarawnı parlament ozaqqa suzmadı. Kiçke dürttä sezgä bu xäbärne äzerläp beterep mataşqanda Tatarstan Däwlät Şurasınıñ 19nçı sessiäse eşen tämamladı.

Azatlıq radiosı Yunıs Ätnäle.

XS
SM
MD
LG